საზოგადოება

დიდუბის ბაზრის ადმინისტრაცია მერიას შევიწროებაში ადანაშაულებს

შპს ,,დუდუბის’’ იგივე დიდუბის ბაზრის ადმინისტრაცია თბილისის მერიას ბაზრობაზე მოქმედი მათი კონკურენტი კომპანიის ლობირებასა ადანაშაულებს.

შპს ,,დიდუბის’’ წარმომადგენლებმა დღეს პრესკონფერენციაზე გამართეს, სადაც განაცხადეს, რომ მერიის არქიტექტურისა და ზედამხედველობის სამსახურები მათ კომპანიას ავიწროვებს.

როგორც დიდუბის ბაზრის იურისტმა, ირაკლი კერესელიძემ აღნიშნა, რომ თბილისის მერიის სამსახურებმა, დიდუბის ბაზრობაზე მათ მიერ გაკეთებული ჭიშკრის დემონტაჟი კონკურენტი კომპანიის ინტერესების დასაცავად მოითხოვეს.

" შპს "MZ"-მ ამ კარის გაღება სავარაუდოდ, კლიენტების მიზიდვის მიზნით მოითხოვა. კარის გახსნით ჩვენი თითოეული მოვაჭრის ინტერესი დაირღვეოდა.

მერიამ მოგვთხოვა, რომ აღნიშნული ჭიშკარი სახანძრო უსაფრთხოების ზომებთან თანხვედრაში ყოფილიყო. საგანგებო სიტუაციების სამსახურებს განვუმარტეთ, რომ მთ ტერიტორიაზე შესვლის პრობლემა არ ექნებოდათ",- განაცხადა კომპანიის იურისტმა.

მისი ინფორმაციით, არქიტექტურის სამსახური ჭიშკრის დემონტაჟს ითხოვს, რასაც კომპანიის წარმომადგენლები არ ეთანხმებიან.

"აღნიშნულის შემდგომ სამართლებრივ ზომებს მივმართეთ და გადაწყვეტილება თბილისის მერთან გავასაჩივრეთ. დავით ნარმანიამ განაცხადა, რომ ჩვენი საჩივარი 11 ნოემბერს განიხილებოდა და მერია მას არ დააკმაყოფილებდა",- აღნიშნა ირაკლი კერესელიძემ.

იურისტის თქმით, თუ მერია კომპანიის საწინააღმდეგო გადაწყვეტილებას მიიღებს, ისინი მას გაასაჩივრებენ.

ამასთან, როგორც შპს ,,დიდუბის’’ დირექტორის მოადგილე გიორგი დვალმა აღნიშნა, კონკურენტ კომპანიას ბაზრობის მიმდებარე ტერიტორიაზე შვიდი კარი აქვს და ტერიტორიის ადგილმდებარეობაც უკეთესია.

,,ჩვენ შპს-ს ტერიტორიაზე შესასვლელი კარი აქვს 3 მოზრდილი და 3 მცირე, ანუ გამოდის 6. რაც შეეხება შპს MZ-ს, აქვს 7 თუ 8 კარები შესასვლელი თავის ტერიტირიაზე და აქედან გამომდინარე, ჩვენგან კიდევ ერთი დამატებითი კარი, რა აუციკებლობას წარმოადგენს, არ ვიცი’’, - განაცხადა დვალმა.

დედაქალაქის მერმა, დავით ნარმანიამ შპს ,,დიდუბის’’ ადმინისტრაციის ბრალდებებს უპასუხა და დიდუბის ტერიტორიაზე მათი კონკურენტი კომპანიის ,,MZ’’-ს ლობირება გამორიცხა.

ნარმანია მერიის სამსახურების მოთხოვნას ჭიშკრის დემონტაჟთან დაკავშირებით, უსაფრთხოების ზომებით ხსნის.

,,ბაზრობის ადმინისტრაცია ვალდებულია, მოვაჭრეებისთვის შექმნას პირობები ერთი მხრივ და მეორე მხრივ, იქ იყო სახანძრო უსაფრთხოებასთან დაკავშირებული ნორმების დარღვევა. სწორედ ამიტომ იყო მიღებული გადაწყვეტილება აღსრულებასთან დაკავშირებით. ამდენად, მნიშვნელოვანია, რომ ოფიციალური ორგანოების მიერ მიღებულ სწორ და კანონიერ გადაწყვეტილებას დაექვემდებაროს ადმინისტრაცია, კეთილი ინებოს და მოაწყოს ტერიტორია და პერიმეტრი ისე, როგორც ეს ერთი მხრივ, სახანძრო უსაფრთხოების ნორმებთან არის დაკავშირებული და მეორე მხრივ, ამის აბსოლუტურად ლეგიტიმური მოთხოვნა არსებობს.

პირადად მე ბაზრობის ხელმძღანელობას არასდროს არ შეხვედრივარ და რაიმე კავშირი არ მაქვს’’, - განუცხადა ჟურნალისტებს დავით ნარმანიამ.

ნინო ექვთიმიშვილი