ეკონომიკა

დიმიტრი ქუმსიშვილი „წითელი ხიდის“ საბაჟო-გამშვები პუნქტის საქმიანობას გაეცნო

პირველი ვიცე-პრემიერი, ფინანსთა მინისტრი დიმიტრი ქუმსიშვილი „წითელ ხიდის“ საბაჟო-გამშვებ პუნქტს ეწვია და საბაჟოს მომსახურების ხარისხს გაეცნო.

ფინანსთა სამინისტროს ცნობით, საბაჟო მგზავრებს და ტვირთის გადამზიდავებს 24 საათის განმავლობაში ემსახურება. მისი მეშვეობით ყველაზე მეტი მგზავრი და ტვირთი გადაადგილდება საქართველო-აზერბაიჯანის საზღვარზე. საბაჟოს სტატისტიკით, ყოველდღიურად აღნიშნულ გამშვებ პუნქტს 10,000 პირი კვეთს.

როგორც ფინანსთა სამინისტროში აღნიშნავენ, „წითელი ხიდის“ საბაჟო-გამშვებ პუნქტს განსაკუთრებული მნიშვნელობა ენიჭება აზერბაიჯანთან სავაჭრო-ეკონომიკური ურთიერთობების მიმართულებით.

აღინიშნა, რომ ორი ქვეყნის საბაჟო უწყებებს შორის თანამშრომლობა მოიცავს ისეთ მიმართულებებს, როგორებიცაა: უსაფრთხო ვაჭრობის ხელშეწყობა, საბაჟო პროცედურების ეფექტური მართვა და ფორმალობების გამარტივება, ინფორმაციის ელექტრონულად გაცვლა, რაც ხელს შეუწყობს ვაჭრობის მოცულობისა და ტურისტული ნაკადის გაზრდას და სხვ.