საზოგადოება

დინამო-არენას სტადიონის მიმდებარე ჯიხურების დემონტაჟისას ხმაური იყო

თბილისში, დინამო-არენას სტადიონის მიმდებარედ მდებარე ჯიხურების ნაწილის დემონტაჟისას ხმაური იყო.

ბორის პაიჭაძის ოჯახის წევრების თქმით, მათ 2012 წელს მერიისგან 250 კვ.მ ფართი იჯარით 49 წლის ვადით გადაეცათ. ახლა კი სტადიონის ადმინისტრაცია და მერია ფართის ჩამორთმევას ითხოვს.

ოჯახის თქმით, ისინი სასამართლოში ჩივილს აპირებენ.

„2012 წლიდან, ყოველწლიურად არის შემოტევა, რომ ჩამოერთვას ჩვენს ოჯახს ეს პავილიონები და გადაეცეს სტადიონს. სასამართლო გადაწყვეტს გავიდეთ- გავალთ ბატონო და დაანგრიონ, თუ გადაწყვეტს დარჩითო-დავრჩებით,“- განაცხადა ჟურნალისტებთან საუბარში ლიანა პაიჭაძემ.

ჯიხურების დემონტაჟის წინააღმდეგ გარემოვაჭრეებიც გამოდიან, რომლებიც დინამო-არენას ადმინისტრაციას დემონტაჟის რამდენიმე თვით შეჩერებას სთხოვენ.

„მე ხომ ვიქირავე ფართი, ხომ უნდა ამოვყიდო საქონელი, სეზონია. ვითხოვ, რომ ერთი 5 თვე, ახალწლამდე დამტოვონ“,- განაცხადა გარემოვაჭრე შორენა ხასაიამ.

ადგილზე საპარლამენტო უმრავლესობის დეპუტატი დიმიტრი ლორთქიფანიძე იმყოფებოდა, რომელმაც გარემოვაჭრეებს დაპირდა, რომ დედაქალაქის მერს უშუალოდ შეხვდება და საკითხის დროულად მოგვარებას სთხოვს.

მონიკა დავლიანიძე