საზოგადოება
ჯანდაცვის სამინისტრო ზეწოლის ქვეშაა, არ სურთ ამ ბავშვის რომელიმე ძლიერ კლინიკაში გადაყვანა - მალხაზ მაჩალიკაშვილი
პანკისის ხეობის სოფელ დუისში 26 დეკემბრის სპეცოპერაციის დროს დაჭრილი თემირლან მაჩალიკაშვილის მამის, მალხაზ მაჩალიკაშვილის ინფორმაციით, მისი შვილის გადაყვანაზე თანახმაა გერმანული კლინიკა. მისივე მტკიცებით, ამას ხელს უშლის ჯანდაცვის სამინისტრო, რომელიც ზეწოლის ქვეშ იმყოფება.
„გერმანიიდან გამოგზავნილი ინვოისი სამინისტროში გადაიგზავნა, ჟურნალისტებსაც ვანახე, რომ იყო გერმანიის კლინიკა თანახმა.
რამდენადაც მე ვიცი, ჯანდაცვის სამინისტრო მუშაობს გადაყვანაზე, მოლაპარაკებები მიმდინარეობს.
ჯანდაცვის სამინისტრო ზეწოლის ქვეშაა, ეს მოდის უსაფრთხოების სამინისტროსგან, შსს-სგან, არ სურთ ამ ბავშვის რომელიმე ძლიერ კლინიკაში გადაყვანა“, -უთხრა მაჩალიკაშვილმა ტვ „იმედს“.
საპირისპიროს ამტკიცებს წმინდა მიქაელ მთავარანგელოზის სახელობის კლინიკური საავადმყოფოს ექიმი ზაზა ლურსმანაშვილი. მან ჟურნალისტებს განუცხადა, რომ მაჩალიკაშვილის ოჯახმა განმეორებითი უარი მიიღო გერმანული კლინიკისგან. მან დაამატა, რომ მაჩალიკაშვილები დაჭრილის თურქეთში გადაყვანაზე უარს ამბობენ.
„დანამდვილებით ვიცი მხოლოდ ის, რომ ოჯახს არ სურს პაციენტის თურქეთში გადაყვანა.
მე რამდენადაც ვიცი, ჯანდაცვის სამინისტრო აგრძელებს ამ მოლაპარაკებებს და ოჯახის ინფორმაციით, განმეორებით ითქვა უარი გერმანიის კლინიკიდან.
უშუალოდ ჩვენი საავადმყოფო ამ მოლაპრაკებებში არ მონაწილეობს“, -თქვა ექიმმა.
გუშინ ლურსმანაშვილისგან გახდა ცნობილი, რომ ერთ-ერთი თურქული კლინიკა მზადაა, მაჩალიკაშვილი მიიღოს და უზრუნველყოს მისი ტრანსპორტირება.
ანა მებურიშვილი