უახლესი ამბები
არქივი
პოლიტიკა
ძალაშია საქართველოს მოთხოვნა მიხეილ სააკაშვილის ექსტრადირების შესახებ - ლევან დავითაშვილი
საქართველოს სოფლის მეურნეობის მინისტრის, ლევან დავითაშვილის განცხადებით, ქართული მხარის მოთხოვნა საქართველოს ექს-პრეზიდენტის, მიხეილ სააკაშვილის უკრაინიდან ექსტრადირების შესახებ ძალაში რჩება. ამის შესახებ მან მთავრობის სხდომის დასრულების შემდეგ ისაუბრა.
„ჩვენთვის, პოლიტიკურად თუ შევხედავთ, ის არის გაკოტრებული პოლიტიკური ფიგურა, დანარჩენი საკითხი გადაცემის ნაწილში არის მთლიანად იურიდიული დეტალი, რომელიც, რა თქმა უნდა, სამართალდამცავებმა უნდა მოაგვარონ. უფრო კომპეტენტურები ამ საკითხში, თუ როგორი იქნება სამართლებრივი პროცედურები, რა თქმა უნდა, არიან სამართალდამცავი უწყებები. რაც შეეხება საქართველოს მხრიდან გადმოცემის საკითხს, რამდენადაც მე მაქვს ინფორმაცია, საქართველოს ეს საკითხი დასმული აქვს ჯერ კიდევ 2014 წელს და შემდგომ დამატებითი ინფორმაცია 2015 წელს არის წარდგენილი. ასე რომ, ძალაშია საქართველოს მოთხოვნა, დანარჩენი არის უკრაინელი სამართალდამცავების გადასაწყვეტი", - განაცხადა დავითაშვილმა.
შეგახსენებთ, გუშინ გავრცელდა ინფორმაცია, რომ მიხეილ სააკაშვილს უკრაინის მოქალაქეობა ჩამოართვეს.
ანა მებურიშვილი