პოლიტიკა
ძალიან ბევრი პიროვნება „ხიშბა-სიგუას“ სიაში აბსოლუტურად სამართლიანად მოხვდა, მათ შორის სააკაშვილი და ახალაია, ბოკერია აკლია - ადა მარშანია
„პატრიოტთა ალიანსის“ წევრი, ადა მარშანია გამოეხმაურა ოკუპირებული აფხაზეთის ე.წ. ვეტერანთა კავშირის მიერ ოთხოზორია-ტატუნაშვილის სიის საპასუხოდ შექმნილ 26-კაციან „ხიშბა-სიგუას“ სიას, რომელშიც მოხვდნენ საქართველოს ყოფილი პრეზიდენტი მიხეილ სააკაშვილი, ყოფილი პრემიერი და შინაგან საქმეთა ყოფილი მინისტრი ვანო მერაბიშვილი და თავდაცვის ყოფილი მინისტრი ირაკლი ოქრუაშვილი. დეპუტატის შეფასებით, ბევრი ამ სიაში სამართლიანად მოხვდა.
მანვე აღნიშნა, რომ გენოციდზე საუბარი რთულია და ამას დამტკიცება სჭირდება.
„როდესაც 2008 წელს ომი მიმდინარეობდა, მაშინ ეს ბატონები იყვნენ საქართველოს მმართველები, ამიტომ დააკავშირეს ომთან და იმ დანაშაულებებთან, რომლებშიც ადანაშაულებენ. ცალკე რომ ავიღოთ, მიხეილ სააკაშვილს მეც შევიყვანდი სიაში, ახალაიასაც, კეზერაშვილს და აგერ, ბოკერია გვიზის პარლამენტში. ჩვენ არ უნდა გაგვიკვირდეს, რომ გაჩნდა ეს სია და ანალიზი უნდა გავუკეთოთ ამ სიას. სხვათა შორის, ძალიან ბევრი პიროვნება, რომელიც ამ სიაში მოხვდა, აბსოლუტურად სამართლიანად მოხვდა, მათ შორის სააკაშვილი და ახალაია. ბოკერია აკლია იმ სიას.
გენოციდი ცალკე მძიმე დანაშაულია, ცხადია, ამას უნდა დამტკიცება“, – აღნიშნა მარშანიამ.
ე.წ. ვეტერანთა კავშირის განცხადებით, „ხიშბა-სიგუას“ სიაში შეყვანილი არიან საქართველოს ის მოქალაქეები, „რომლებსაც ბრალი მიუძღვით ომის დანაშაულებში, გენოციდსა და ტერორისტულ აქტივობებში“.
26-კაციან სიაში შეყვანილი არიან: ბაჩო ახალაია, სოსო ახალაია, ირაკლი ბათიაშვილი, სლავა ბიგვავა, ავთანდილ ბულისკერია, რობერტ გამისონია, ზაზა გოგავა, ბეჟან გოლანძია, ირაკლი ოქრუაშვილი, ზაზა კაკულია, მეგის ქარდავა, გია ყარყარაშვილი, დავით კეზერაშვილი, თენგიზ კიტოვანი, მამუკა ყურაშვილი, იუსუპ ლაკაევი, ვანო მერაბიშვილი, დავიდ იორაშვილი, ემზარ ფონიავა, მიხეილ სააკაშვილი, ალიკა სამუშია, ბესიკ თოფურია, ომარ ხარჩილავა, მანუჩარ ჩანგელია, რომან შამათავა, დავით შენგელია.