საზოგადოება

ძალიან შეურაცხყოფილად და სულში ჩაფურთხებულად ვგრძნობ თავს - მოქალაქე პატრულს ძალადობაში ადანაშაულებს

„ძალიან შეურაცხყოფილად და სულში ჩაფურთხებულად ვგრძნობ თავს“, - ამის შესახებ მოქალაქე გიორგი პერტაიამ განაცხადა, რომელიც პატრულის თანამშრომლებს ფიზიკურ და სიტყვიერ შეურაცხყოფაში ადანაშაულებს, ასევე ნარკოტიკის ჩადებისა და მეუღლისადმი მიმართულ მუქარაში.

პერტაიას ნაამბობიდან ირკვევა, რომ პატრულმა 27 ნოემბერს გააჩერა ნიკოლაძის ქუჩაზე. მისი თქმით, მან ყველა საჭირო საბუთი წარადგინა.

„გამაჩერეს. რომ გამაჩერეს, წარვუდგინე მართვის მოწმობა, ყველაფერი. მე ვარ ვეტერანი პოლიციელი, და წარვუდგინე შემდეგი საბუთი : „საქართველოს ძალოვან ვეტერანთა და პატრიოტთა პოლიტიკური მოძრაობა“.

პატრულის თანამშრომელმა მითხრა, შენ თუ პატრულის თანამშრომელი ხარ, პოლიტიკაში რა გინდა , შენ არ ხარ პოლიციელი და ა.შ“, - მოყვა პერტაიამ.

პერტაიას განმარტებით, ის პოლიციის ვეტერანია და აფხაზეთის ომის მონაწილე. ძალოვანი უწყებიდან კი შევარდნაძის დროს თავისი ნებით წამოვიდა.

მისი თქმით, პოლიციელები აგდებულად ელაპარაკებოდნენ.

„ნასვამიც არ ვყოფილვარ და არაფერი. ისე დამელაპარაკა პოლიციელი, რომ მერე მეც გადმოვედი ავტომობილიდან და დავიწყეთ საუბარი. გეფიცებით, ისე მესაუბრებოდა, თითქოს რაღაც დანაშაული მქონდა“, -თქვა ყოფილმა პოლიციელმა დღევანდელ პრესკონფერენციაზე.

პერტაიას განცხადებით, პოლიციელებმა სრულიად უმიზეზოდ ჩასვეს მანქანაში, ასევე ემუქრებოდნენ მის ცოლს.

„მეორე პოლიციელი ეუბნება, - ბიჭო, რას აბლატავებ ამას. თავის მანქანასთან რომ მიმიყვანეს, მერე დამადეს ხელბორკილები და ჩამსვეს ავტომობილში. რომ მივდიოდით და ვეუბნებოდი, ძმაო, რატომ მეცქევი ასე, მე თქვენი ყოფილი კოლეგა ვარ. თუ რამე დანაშაული მაქვს ვინმეს წინაშე, კი ბატონო, დამიჭირეთ. ჩემთვის მივდიოდი, არაფერი არ დამიშავებია. მეუბნებოდნენ - შენ მთვრალი ხარ, შენ ნარკომანი ხარ, არ ვარ ნარკომანი-მეთქი.

მანქანაში მეუბნებოდნენ, რომ შენს ცოლს წაიყვანენ და იმას უზამენ, შენ იქ შეგიყვანთ, იმას გიზამთ“, - თქვა პერტაიამ.

ვეტერანმა პოლიციელმა მოჰყვა, რომ კისრის არეში ურტყამდნენ.

„მუჯლუგუნებს მირტყამდნენ კისრის არეში, ისედაც ხერხემალზე ტრავმა მაქვს, ძალიან მტკივა. ტერორისტი მეგონა თავი“,-თქვა პერტაიამ.

პერტაიას უფლებებს ორგანიზაცია „კონსტიტუციის 42-ე მუხლი“ იცავს, რომელმაც გენერალურ ინსპექციას საქმით დაინტერესებისკენ და საპატრულო ეკიპაჟის წევრების დასჯისკენ მოუწოდა.

ანა მებურიშვილი