საზოგადოება

ძიუდოს ფედერაციის პრეზიდენტმა გადააყენა წარმატებული მწვრთნელები და თავისი მეგობრები მოიყვანა - შოთა ხაბარელი დავით ქევხიშვილის გადადგომას ემხრობა

სპორტისა და ახალგაზრდულ საქმეთა საპარლამენტო კომიტეტის თავმჯდომარის პირველი მოადგილის, შოთა ხაბარელის თქმით, ძიუდოს ფედერაციის პრეზიდენტი დავით ქევხიშვილი უნდა გადადგეს.

ხაბარელმა ქევხიშვილის საკადრო პოლიტიკა გააკრიტიკა.

„იყვნენ წარმატებული მწვრთნელები და ისინი გადააყენეს და შემდეგ მოვიდნენ ამ სფეროში, როგორც მწვრთნელები, არაკომპეტენტური პირები და შედეგიც დადგა ეს. ბიჭები ამას აპროტესტებენ. წარმატებული მწვრთნელების გადაყენებამ ეს შედეგი მოიტანა. აქედან გამომდინარე, მისი ბრალეულობა გამოიკვეთა და მეც ვფიქრობ, რომ პრეზიდენტმა არასწორი გადაწყვეტილება მიიღო იმით, რომ მან გადააყენა წარმატებული მწვრთნელები და თავისი მეგობრები მოიყვანა. ეს არის ყველაზე მტკივნეული და ცუდი“, - განაცხადა ხაბარელმა.

მან აღნიშნა, რომ „როდესაც ხდება ასეთი კაზუსი, წარმატებული მწვრთნელების გადაყენება და მისი შემოქმედი არის პრეზიდენტი, ის უნდა გადადგეს“.

ძიუდოისტთა ნაწილის პროტესტი გრძელდება. სპორტსმენებმა ძიუდოს ფედერაციის პრეზიდენტის, დავით ქევხიშვილის კაბინეტიდან სკამი გამოიტანეს და სანაგვე ურნაში გადააგდეს. ამის შემდეგ ძიუდოისტებმა ქევხიშვილს კაბინეტის კარი აუჭედეს.

სპორტსმენები დილიდან ძიუდოს ფედერაციის შენობასთან შეიკრიბნენ. მათი მოთხოვნა უცვლელია - გადადგეს დავით ქევხიშვილი.

გარდა ამისა, სპორტსმენებმა უნდობლობა გამოუცხადეს თითქმის 2 კვირის წინ შექმნილ კომისიას, რომელიც აერთიანებს კულტურის სამინისტროს, სპორტის საპარლამენტო კომიტეტისა და ოლიმპიური კომიტეტის წევრებს. სპეციალურ კომისიას ევალება ძიუდოს ფედერაციაში შექმნილი ვითარების შესწავლა.

დაძაბულობა ევროპის ჩემპიონატზე დაფიქსირებულმა შედეგებმა გამოიწვიეს, როცა ქართველი ძიუდოისტები უმედლოდ დაბრუნდნენ. ამის შემდეგ ეროვნული ნაკრების სამწვრთნელო შტაბის სრული შემადგენლობა გადადგა.