საზოგადოება

ძიუდოს ფედერაციის პრეზიდენტმა თანამდებობა დატოვა

ძიუდოს ფედერაციის პრეზიდენტმა დავით ქევხიშვილმა თანამდებობა დატოვა. ამის შესახებ მან ფეისბუკის საკუთარ გვერდზე დაწერა.

ქევხიშვილის განმარტებით, მან ეს ნაბიჯი იმიტომ გადადგა, რათა „თავის საქმის ღირსეულ კეთებაზე“ ორიენტირებულმა ძიუდოისტებმა მშვიდ ვითარებაში იმუშაონ.

„ჩემს თითოეულ თანამშრომელს, მწვრთნელს, კლუბების წარმომადგენელს, ძიუდოს გულშემატკივარს, ნამდვილ ძიუდოისტს,

კიდევ ერთხელ ვადასტურებ თქვენდამი უდიდეს პატივისცემას, თუმცა ამ შემთხვევაში, როგორც ფედერაციის პრეზიდენტი უნდა დაგემშვიდობოთ. რა თქმა უნდა აქამდეც შემოძლო ამ გადაწყვეტილების მიღება, მაგრამ მხოლოდ იმიტომ, რომ ამას ითხოვდნენ პიროვნულ ინტერესებზე ორიენტირებული ძალები, ეს არ გავაკეთე. არ გავაკეთე არა პირადი, არამედ ძიუდოს იტერესებიდან გამომდინარე, რამეთუ პრინციპული პოზიცია სიმართლის დაცვა და შესაბამისად, სამართლებრივი ინსტიტუტების დღეს, როგორც არასდროს, არა მხოლოდ სპორტის, არამედ ყველა სხვა სახელმწიფოებრივ სტრუქტურასთან მიმართებაში არის სასიცოცხლოდ მნიშვნელოვანი ჩვენი ქვეყნის მომავალი განვითარებისთვის.

მე ვტოვებ ფედერაციის პრეზიდენტის პოსტს, რამეთუ ყველა იმ ძიუდოისტს, რომელიც ორიენტირებულია თავის საქმის ღირსეულად კეთებაზე, მიეცეს მშვიდ ვითარებაში ამ საქმის კეთების საშუალება და არ გახდნენ პროვოკაციის მსხვერპლნი, რომელსაც ამ ხნის განმავლობაში ძალიან ბევრჯერ ჰქონდა ადგილი.

დარწმუნებული ვარ, რომ ის პროექტები, რომლებიც უკანასკნელ პერიოდში დიდი ძალისხმევისა და შრომის ფასად შევქმენით, ძალიან მალე კიდევ უფრო დიდ წარმატებას მოუტანს ქართულ ძიუდოსა და ჩვენს ქვეყანას“, - დაწერა ქევხიშვილმა.

თითქმის ერთი თვეა, ძიუდოისტთა ნაწილი დავით ქევხიშვილის გადადგომას ითხოვდა, ამის მიზეზად კი ასახელებდნენ ქართულ ძიუდოში შექმნილ ვითარებას. პროტესტის ნიშნად სპორტსმენებმა ვარჯიშზე უარი თქვეს.

დაძაბულობა ევროპის ჩემპიონატზე დაფიქსირებულმა შედეგებმა გამოიწვიეს, როცა ქართველი ძიუდოისტები უმედლოდ დაბრუნდნენ. ამის შემდეგ ეროვნული ნაკრების სამწვრთნელო შტაბის სრული შემადგენლობა გადადგა.