პოლიტიკა
ეკა ბესელიამ პარლამენტის იურიდიული კომიტეტის თავმჯდომარის თანამდებობა დატოვა
ეკა ბესელიამ პარლამენტის იურიდიული კომიტეტის თავმჯდომარის თანამდებობა დატოვა.
შესაბამისი განცხადება მან რამდენიმე წუთის წინ, პარლამენტში გამართულ საგანგებო ბრიფინგზე გააკეთა.
ბესელია ადასტურებს, რომ მისი თანამდებობიდან წასვლა მოსამართლეების უვადოდ გამწესების საკითხს უკავშირდება და ამბობს, რომ განსახილველად წარდგენილ სიაში არიან მოსამართლეები, რომლებიც მისი შვილის და ძმის საკითხებს განიხილავდნენ.
„ფიქრის შემდეგ, მივიღე გადაწყვეტილება, დავტოვო იურიდიული კომიტეტის თავმჯდომარის თანამდებობა. ამ გადაწყვეტილებით გუშინ შევაჩერეთ პროცესი, რომელიც მიმაჩნია, რომ იყო ძალიან საზიანო და ეხება უზენაესი სასამართლოს მოსამართლეების უვადოდ დანიშვნის ნაჩქარევ და გაუმართლებელ პროცესს“, – განაცხადა ბესელიამ.
ეკა ბესელია მეცხრე მოწვევის პარლამენტში იურიდიულ საკითხთა კომიტეტს დაახლოებით ორი წელი ხელმძღვანელობდა.
როგორც ცნობილია, პოსტიდან წასვლის შესახებ განცხადება დაწერა მისმა მოადგილემ ვანო ზარდიაშვილმაც და ის განცხადებას მოგვიანებით გააკეთებს.