საზოგადოება

ელისო კილაძის მეუღლე სახელმწიფოს მხედრული მამაცობისთვის გადაცემულ ჯილდოს უბრუნებს

გაზეთი ქრონიკა პლუსის მთავარი რედაქტორის, ელისო კილაძის მეუღლემ, ვიცე-პოლკოვნიკმა გრიგოლ ხარშილაძემ სახელმწიფოს, პროტესტის ნიშნად, ჯილდოს უბრუნებს, რომელიც მას მხედრული მამაცობისთვის და განსაკუთრებით საშიში კრიმინალური დაჯგუფების წინააღმდეგ წარმატებული ბრძოლისთვის შს მინისტრმა, კობა ნარჩემაშვილმა გადასცა.

ამის მიზეზი მისი შვილის დაკავება გახდა, რომელსაც პოლიციამ ნარკოტიკული საშუალება ამოუღო.
გროგოლ ხარშილაძეს კი მიაჩნია, რომ პოლიციამ მის შვილს, ნარკოტიკი ჩაუდო.

”ბატონო, შინაგან საქმეთა მინისტრო, დიდი ხნის ფიქრის შემდეგ გადავწყვიტე დავაბრუნო სახელმწიფო ჯილდო - მედალი მხედრული მამაცობისთვის, რომელიც მე შს ორგანოებში მუშაობის დროს, იმ დროინდელი შს მინისტრის, კობა ნარჩემაშვილის წარდგინებით, განსაკუთრებით საშიში კრიმინალური დაჯგუფების წინააღმდეგ წარმატებული ბრძოლის გამო მივიღე. დაჯგუფება ეწეოდა დასავლეთ საქართველოში ადამიანების გატაცებას. მივიღე გადაწყვეტილება, რომ ეს ჯილდო ჩემზე მეტად თქვენ გჭირდებათ, რათა დააჯილდოვოთ ის პოლიციელები, რომლებმაც დიდი ოდენობით ნარკოტიკი ჩაუდეს ჩემს შვილს, დავით ხარშილაძეს. ეს მათ წაახალისებს და გულმოდგინეობას შესძენს, შეასრულონ ბიძინა ივანიშვილისა და ”ქართული ოცნების” დაკვეთები”, - ნათქვამია გრიგოლ ხარშილაძის განცხადებაში, რომელიც ჟურნალისტებს მოდულის შენობასთან ელისო კილაძემ გააცნო.

მონიკა დავლიანიძე