ეკონომიკა
ექსპერტები სურსათსა და საწვავზე ფასების ზრდას პროგნოზირებენ
ექსპერტები ლარის კურსის გაუფასურების ტენდენციის გავლენით იმპორტულ სამომხმარებლო პროდუქციაზე ფასების ზრდას პროგნოზირებენ.
ექსპერტი ეკონომიკის საკითხებში ირაკლი ყიფიანი ვარაუდობს, რომ ფასების ზრდის რისკია მაღალია.
,,ჩვენი სამომხმარებლო კალათა ძირითადად არის იმპორტირებული პროდუქცია, რომელიც შემოდის უცხოეთიდან. შესაბამისად, როდესაც იმპორტიორი ხედავს რომ დღეს არის ინფლაციური პროცესები, დღეს გააძვირებს იმ მარაგებს, იმიტომ, რომ ხვალ მოუწევს უფრო მეტი თანხის გადარიცხვა უცხოეთში, იმიტომ, რომ ლარში აქვთ გაყიდვები და უცხოურ ვალუტაში ხარჯები. შესაბამისად, ისინი ფასს გაზრდიან დღეს. ამიტომ, რისკი იმის, რომ გაიზარდოს სასურსათო კალათაზე ფასები, რისკი იმის, რომ გაიზარდოს საწვავის ფასები არის ძალიან მაღალი. ეს რისკები დადგება ძალიან მალე, თუ ეს სავალუტო რყევები გაგრძელდა, ისე როგორც გრძელდება ამ ხნის განმავლობაში“, - ამბობს ეკონომისტი ირაკლი ყიფიანი.
ეროვნული ვალუტის გაუფასურების შედეგად ფასების ზრდის გარდაუვალობაზე საუბრობს ეკონომისტი გიორგი პაპავაც.
,,პირველ რიგში ეს ყოველთვის აისახება სურსათზე, იმპორტულ პროდუქციაზე. რა თქმა უნდა, აისახება საწვავზე, საწვავიდან გადაეცემა ხოლმე სადისტრიბუციო კომპანიებს და ნელ-ნელა ასე გაიწოვება სხვადასხვა პროდუქციაზე. თითქმის ვერ დავასახალებ პროდუქტს, რომელზეც ეს გავლენას ვერ მოახდენს“, - აცხადებს პაპავა.
ნინო ექვთიმიშვილი