უახლესი ამბები
არქივი
პოლიტიკა
ერთი სპექტაკლი დაიწყეთ და ჩაგივარდათ, მეორე სპექტაკლიც ჩაგივარდებათ - ირაკლი კობახიძიძე ნიკა მელიას
პარლამენტის თავმჯდომარემ ირაკლი კობახიძემ გუშინ გამოქვეყნებული აუდიოჩანაწერები „ნაციონალური მოძრაობის“ მიერ დადგმული სპექტაკლი უწოდა. როგორც ირაკლი კობახიძემ ბიუროს სხდომაზე „ნაციონალური მოძრაობის“ წევრის ნიკა მელიას საპასუხოდ განაცხადა, ეს სპექტაკლი „ნაციონალურ მოძრაობას“ ჩაუვარდება.
„ბანდიტები, სასახლეებიც, კრიმინალიც თქვენკენ მოიკითხეთ. საკუთარი, პირადი ცოდვებიც მოიკითხე, ბატონო ნიკა, გარდა გუნდის ცოდვებისა. ზოგადად, „ნაციონალური მოძრაობის“ წარმომადგენელი რომ საუბრობს მაღალ მატერიებზე, ესაა უბედურება და ეს უბედურება ძალიან მალე უნდა დასრულდეს. „ნაციონალური მოძრაობა“ გამოირჩეოდა გაუპატიურებით, ადამიანების ღირსების შელახვით, ბიზნესის რეკეტითა და ათასი უბედურებით. ეს ადამიანები ახლა ლაპარაკობენ სპექტაკლებით გამოგონილ თემებზე. ერთი სპექტაკლი დაიწყეთ და ჩაგივარდათ, მეორე სპექტაკლიც ჩაგივარდებათ ისევე როგორც პირველი სპექტაკლი“, - მიმართა მელიას კობახიძემ.
როგორც „ნაციონალური მოძრაობის“ ერთ-ერთმა ლიდერმა ნიკა მელიამ ბიუროს სხდომაზე განაცხადა, გუშინდელი ჩანაწერები არის იმის დამადასტურებელი, რომ ამ ქვეყანას მართავს შეიარაღებული დაჯგუფებები, „რომლებიც იმართებიან და მჭიდრო კომუნიკაციაში არიან მინისტრებთან, განსაკუთრებით სუბართან, გახარიასთან“. მან მიმართა უმრავლესობის წევრებს და უთხრა, რომ ისინი „ფარცხალაძე-სუბელიანების“ ტყვეობაში არიან.
პარლამენტის ბიუროს სხდომაზე რუსთავი 2-ის მიერ გუშინ გამოქვეყნებულ ჩანაწერებს განიხილავენ, რომლებშიც, სავარაუდოდ, მირზა სუბელიანი ფიგურირებს.