საზოგადოება

“ეს არის კადრი ფილმიდან საშიში კინო და გვინდა დასრულდეს` - პრეზიდენტის ადმინისტრაციის წინ აქცია გაიმართა

სალომე ზურაბიშვილის საგანგებო ბრიფინგის პარალელურად პრეზიდენტის ადმინისტრაციის წინ აქცია "სირცხვილია" მიმდინარეობდა.

მოძრაობის აქტივისტები ნიღბებით მივიდნენ. ისინი სალომე ზურაბიშვილისგან მოითხოვდნენ პასუხს, თუ რატომ შეიწყალა ქვეყნის პრეზიდენტმა მკვლელობაში ბრალდებული რამდენიმე პირი.

აქციის წევრები პრეზიდენტის გადაწყვეტილებას სამარცხვინოსა და უპასუხისმგებლოს უწოდებენ.

"სალომე ზურაბიშვილი საქართველოს პრეზიდენტი იქცევა სამარცხვინოდ და უპასუხისმგებლოდ, როდესაც იწყალებს მკვლელებს. ეს არის თითოეული ქართული ოცნების წარმომადგენლის პასუხისმგებლობა, როდესაც გუშინ კახი კალაძე გამობრძანდა და თქვა, რომ თურმე ჩანაწერში არის რაღაცა შესატანი ცვლილებები, პირველ რიგში გადასახედი არის პრეზიდენტის კანდიდატურა, რომელსაც აყენებ ასეთ საპასუხისმგებლო კანდიდატურაზე და შემდეგ მის გაპრეზიდენტებას ეხმარებიან კრიმინალები და ძველი ბიჭები, რომლის ვალსაც დღეს იხდის ალბათ სალომე ზურაბიშვილი აი, ამ შეწყალების აქტით," -აცხადებს აქციის მონაწილე.

"ჩვენი ნიღბები არის სიმბოლური, ეს არის კადრი ფილმიდან საშიში კინო და გვინდა, რომ ეს ძალიან საშიში კინო, რაც ქართულმა ოცნებამ წამოიწყო, დასრულდეს,"- განაცხადა მოძრაობა "სირცხვილია"-ს ერთ-ერთმა აქტივისტმა.