საზოგადოება
ეს დაპირისპირების გზაა და ეს ხელისუფლების არჩევანია - თემურ შაშიაშვილი
იმერეთის ყოფილი გუბერნატორი თეიმურაზ შაშიაშვილი, რომელიც მეცნიერებთან ერთად, აქტიურადაა ჩართული რიონის ხეობის დაცვაში, მწვავე შეფასებას აძლევს ქუთაისის მაჟორიტარის, ზაზა ლომინაძის განცხადებას, რომ „ერთადერთ პრობლემა ნამახვანჰესის მიმართ მოსახლეობის დაბალ ინფორმირებულობაშია“.
„ ვწუხვარ,რომ ამას ამბობს დეპუტატი, რითაც უამრავ ადამიანს გვაყენებს შეურაცხყოფას. ანუ, მოსახლეობას არასწორ ინფორმაციას ვაწვდით და ხალხი მოტყუებით შეიკრიბა 28 თებერვალს ქუთაისში?! მე კი ვიტყვი, რომ სწორედ ცუდად ინფორმირების ბრალია, რომ რიონის ხეობის დასაცავად მთელი საქართველო არ დგას ფეხზე.
მივმართავ პარლამენტს, მთავრობას, გამოაქვეყნეთ დღემდე ხალხისთვის დამალული 2019 წლის 21 ნოემბრის პრემიერის დადგენილება, თურქულ კომპანიასთან გაფორმებული ხელშეკრულება და გარწმუნებთ, მთელი საქართველო დადგება ფეხზე!“ - განაცხადა შაშიაშვილმა.
მან სატელევიზიო დებატებში გამოიწვია ამ განცხადების ავტორი, ასევე საკანონმდებლო და აღმასრულებელი ხელისუფლების წევრები.
„ხალხი გააცნობიერებს, რა ანტიქართული დოკუმენტებია მიღებული! პირდაპირ ვამბობ ,ყოველგვარი განხილვა , თუნდაც პირდაპირ ეთერში , სამთავრობო დოკუმენტების პრესაში გამოქვეყნებისა და განსხვავებული აზრის წარმომადგენელთა სხდომის მუშაობაში მონაწილეობის გარეშე, ხალხის მოტყუებაა და მეტი არაფერი... ეს დაპირისპირების გზაა და ეს ხელისუფლების არჩევანია, რადგან ხეობის წარმომადგენლებიც, მეცნიერთა კონგრესიც, თითქმის ერთი წელია, ვითხოვთ ამ პროცესის სრულ გამჭირვალობას და თანამშრომლობის გზით, ხალხთან დათათბირებით და პროფესიონალთა რჩევებზე დაყრდნიბით, ქვეყნის სასარგებლოდ მის გადაწყვეტას!“ - აცხადებს თემურ შაშიაშვილი.