საზოგადოება

ეს ეჭვები რაზე ეფუძნებოდა, ეს ცოტა გაუგებარი იყო ჩემთვის - სოფიო კილაძე რუსლან ალდამოვის განცხადებაზე

ადამიანის უფლებათა დაცვისა და სამოქალაქო ინტეგრაციის საპარლამენტო კომიტეტის თავმჯდომარისთვის, სოფიო კილაძისთვის გაუგებარი აღმოჩნდა ტერორიზმის საქმეში ბრალდებული რუსლან ალდამოვის განცხადება. ალდამოვმა გუშინ დუმილი დაარღვია და თავის ადვოკატს, მარიამ კუბლაშვილს გაუმხილა, რომ სპეცრაზმელები სინამდვილეში მის ლიკვიდაციას ცდილობდნენ, თუმცა შეცდომით თემირლან მაჩალიკაშვილი მოკლეს.

კილაძის შეფასებით, განცხადება მხოლოდ ბრალდებულის ეჭვებს ეფუძნებოდა და არ იყო არგუმენტირებული.

„ამ ადამიანს აქვს ეჭვი და ეს ეჭვი ნამდვილია თუ არა, ალბათ, გამოძიების საკითხია. სიმართლე გითხრათ, არგუმენტირებული პასუხი მე ვერ მოვისმინე, ეს მხოლოდ კონკრეტული ადამიანის ეჭვებთანაა დაკავშირებული. ეს ეჭვები რაზე ეფუძნებოდა, ეს ცოტა გაუგებარი იყო ჩემთვის, რაღაც ბუნდოვანი იყო ძალიან, თუ უფრო კონკრეტულ მტკიცებულებებს წარმოადგენენ და უფრო ნათელს მოფენენ ამ საქმეს, რა თქმა უნდა, ჩვენც უფრო გაგვიადვილდება დასკვნის გამოტანა, მაგრამ იქიდან, რაც მოვისმინეთ, ჩემთვის პირადად არ იყო ძალიან დამაჯერებელი“, -უთხრა დეპუტატმა ჟურნალისტებს.