სამართალი
ეს საქმე დაემსგავსება სხვა საქმეებს, რომლებმაც შეიწირა წინა ხელისუფლება - ადვოკატი მტკვარში ნაპოვნი ახალგაზარდას საქმეზე
მიმდინარე წლის აგვისტოში, მტკვარში ნაპოვნი ზურაბ ხუციშვილი-ელიბაშვილის თვითმკვლელობამდე მიყვანის საქმის გადაკვალიფიცირებას მოითხოვს გარდაცვლილის ოჯახის ადვოკატი, ლაშა შუკაკიძე და გამოძიებას საქმის უმოქდებობაში ადანაშაულებს.
შუკაკიძე ფიქრობს, რომ საქმე ეხება მკვლელობას, რომელსაც გამოძიება ,,საგანგებოდ მალავს.’’
ადვოკატის ინფორმაციით, ზურაბ ხუციშვილი-ელიბაშვილი მიმდინარე წლის 1 აგვისტოს მიემართებოდა თბილისის აეროპორტში დედასთან და მის ძმასთან შესახვედრად, რა დროსაც ის პოლიციამ გააჩერა წმინდა ნიკოლოზის სახელობის ეკლესიის ტერიტორიაზე.
,,გააჩერეს. შემდეგ ის დაუყოვლებლივ მოტრიალდა და გამოემართა უკან სახლისკენ, მტკვრის მარცხენა სანაპიროთი. ჩოლოყაშვილის ხიდთან ის კვლავ საპატრულო პოლიციის ეკიპაჟის მიერ იქნა გაჩერებული, რაც ჩვენ კამერებში ვნახეთ და დავაფიქსირეთ. ამის შემდეგ იკარგება ამ ადამიანის კვალი. მას შემდეგ 3 აგვისტოს ეს ადამიანი უკვე გარდაცვლილი აღმოაჩინეს მტკვარში.
მიუხედავად იმისა, რომ ჩვენ არაერთი განცხადება შევიტანეთ სასამართლოში, პროკურატურაში და ასე შემდეგ, პროკურატურა, პოლიცია ამ საქმეს საგანგებოდ მალავს. დაზარალებულადაც კი არ ვიქენით ჩვენ ცნობილი იმისათვის, რომ მასალები ოფიციალურად მიგვეღო ამ საქმეში, კამერის ჩანაწერები და ასე შემდეგ.
ამ მდგომარეობას ამძაფრებს ის ფაქტი, რომ როდესაც დედამისი მივიდა გამომძიებელთან, გამომძიებელმა მას მიაყენა შეურაცხყოფა და უთხრა, რომ შეეწყვიტა ამ საქმეზე დევნა, დაევიწყებინა ყველაფერი და მიეხედა გარდაცვლილისთვის. ეს არის აღმაშფოთებელი ფაქტი და მოვუწოდებთ გამომძიებელსაც და ამ საქმეში მონაწილე ყველა პირს, დაუყოვნებლივ გამოიძიონ ზურაბ ხუციშვილი-ელიბაშვილის მკვლელობის ფაქტი. წინააღმდეგ შემთხვევაში ვპირდებით, რომ ეს საქმე დაემსგავსება სხვა საქმეებს, რომლებმაც შეიწირა წინა ხელისუფლება. საქმეს ამჟამად აქვს კვალიფიკაცია - თვითმკვლელობამდე მიყვანა.
ჩვენ გვაქვს ეჭვი, რომ ეს იყო მკვლელობა. ადამიანი აბსოლუტურად მშვიდად მიემართებოდა თავის ოჯახთან შესახვედრად. პოლიციამ გააჩერა ნიკოლოზის ეკლესიასთან, იქ ჩვენთვის გაურკვეველია, რა მოხდა, რა დროსაც ის დაუყოვნებლივ მოტრიალდა და წამოვიდა უკან. მას შემდეგ მას მოყვება მთელი გზა საპატრულო ეკიპაჟი, აჩერებს კვლავ და შემდეგ ადამიანია ქრება, იკარგება’’, - განაცხადა ადვოკატმა.
ნინო ექვთიმიშვილი