საზოგადოება

ესაა ბიძინა ივანიშვილის პირადი ვეტო -კახა კუკავამ იუსტიციის სახლს აბრა „ზვიად გამსახურდიას სანაპირო“ გააკრა

„დემოკრატიული მოძრაობა-თავისუფალი საქართველოს" თბილისის მერობის კანდიდატმა კახა კუკავამ იუსტიციის სახლთან აბრა „ზვიად გამსახურდიას სანაპირო“ გააკრა.

კუკავამ აღნიშნა, რომ ყველა იურიდიულ დოკუმენტში ქუჩა „ზვიად გამსახურდიას სანაპიროს“ სახელითაა მითითებული, თუმცა შენობებს მხოლოდ „სანაპიროს ქუჩა“ აწერიათ.

თბილისის მერობის კანდიდატის მტკიცებით, ქუჩისთვის ზვიად გამსახურდიას სახელის შემცველი აბრის გაკვრას ბიძინა ივანიშვილი უშლის ხელს.

„ახლა ვართ ზვიად გამსაზურდიას სანაპიროზე. ასე ეწოდება ამ ქუჩას ფორმალურად, Google Map-შიც ასეა მითითებული. ქალაქის საკრებულომ მიიღო ეს გადაწყვეტილება, მაგრამ ესაა ბიძინა ივანიშვილის პირადი გადაწყვეტილება, პირადი ვეტო. თბილისის აეროპორტს არ დაარქვეს ეს სახელი და თქვენ რომ ჩამოიაროთ, ყველა შენობაზე სამარცხვინოდაა მითითებული „სანაპიროს ქუჩა“ და არა, როგორც ეს არის იურიდიულ დოკუმენტებში „ზვიად გამსახურდიას სანაპირო“.

რაკი ვერ მონახა წულუკიანმა თანხები, მისი დამზადება ჯდება დაახლოებით 45 ლარი. იუსტიციის სახლსა და იუსტიციის მინისტრს შევახსენებთ და ამ აბრას დავამონტაჟებთ იუსტიციის სახლზე“, - განაცხადა კუკავამ ჟურნალისტებთან.

ანა მებურიშვილი