პოლიტიკა

ესეც ის დუმილია, რაც დანაშაულის ტოლფასია - როსტომ ჩხეიძე

უჩემოდაც ბევრი ითქმის საქართველოს პრემიერ-მინისტრის ჩარტერულ რეისსა და ამ ყოვლად გაუმართლებელი მოქმედების მიჩქმალვა-გადაფარვის მცდელობებზე მმართველი პარტიის მხრიდან. ბევრი ითქმის ვითომდა კერძო პირის, სინამდვილეში კი დიდი გავლენის მქონე ოთარ ფარცხალაძის დასანქცირებაზეც ამერიკის სახელმწიფო დეპარტამენტის მოთხოვნით, - ამის შესახებ დეპუტატმა როსტომ ჩხეიძემ პლენარულ სხდომაზე განაცხადა.

„ისედაც ათასი პრობლემითა და თავსატეხით სავსე საზოგადოებრივ-პოლიტიკურ ცხოვრებაში ავისმომასწავლოებლად შემოიჭრა ჩრდილოეთ ოსეთიდან ვითომდა მომლოცველთა ჯგუფის ჩამოსვლა თრუსოს ხეობაში წინაპართა საფლავების მოსანახულებლად.

ექვსი გვარის 23 წარმომადგენლის ორდღიანი ვიზიტი თითქოსდა ჰუმანიტარულ მიზანს ისახავდა, მაგრამ რა საერთო შეიძლება ჰქონდეს ჰუმანიტარულ მიზანს კრემლის იმპერიულ გეგმებთან, ზედაპირზე რომ ძევს ეს გეგმა.

თრუსოს ხეობას ცხინვალის საოკუპაციო რეჟიმი თავის კუთვნილ ტერიტორიად მოიხსენიებს და კარგა ხანია არის მცდელობა საოკუპაციო ხაზის გადმოწევისა ამ მიმართულებით.

და აგერ კიდევ ერთი სიგნალი ამ მისწრაფების გზაზე.

მაინც როგორ შეიძლება მომხდარიყო აშკარად პოლიტიკური მიზნით მომზადებული მომლოცველების შემოსვლა საქართველოს საზღვარზე?

რუსეთის საინფორმაციო წყაროებიდან შევიტყობდით, რომ:

ეს ვიზიტი ორი თვის განმავლობაში მზადდებოდა და წინასწარ ოფიციალური ნოტაც გამოეგზავნა საქართველოს საგარეო სამინისტროს.

გამოყენებული ყოფილა პირადი კონტაქტებიც საქართველოს კომპეტენტური ორგანოებისა და სამღვდელოების წარმომადგენლებთან.

რუსეთის მხრიდან ვიზიტის ორგანიზებაში მონაწილეობდნენ მათი საგარეო სამინისტრო და საქართველოში მოქმედი შვეიცარიის საელჩოს რუსეთის ინტერესების სექცია, რომელნიც მიზანმიმართულად ახორციელებენ იმპერიულ პოლიტიკას.

და რატომღა უნდა მიეღო მონაწილეობა ამ ანტისახელმწიფოებრიც, ანტიხალხურ და ანტიჰუმანურ აქციაში საქართველოს მხარესაც?

ქართველო ლტოლვილები ხომ ვერაფრისდიდებით ვერ ახერხებენ, რომ: თუნდ ერთადერთ დღეს - აღდგომას - გადავიდნენ საოკუპაციო ხაზის იქით და მოინახულონ წინაპართა თუ ოჯახის წევრთა საფლავები.

რადიო „თავისუფლება“ რომ მოინდომებდა გაერკვია, როგორ და რატომ უნდა მომხდარიყო ქართული მხარის თანხმობა ამ ყოვლად გაუმართლებელ პოლიტიკურ აქციაზე, საქართველოს საგარეო საქმეთა სამინისტრო იმით მოიცილებდათ:

აღნიშნულთან დაკავშირებით საგარეო უწყებას არანაირი ინფორმაცია არ გააჩნიაო.

ჟურნალისტების შეკითხვა უპასუხოდ დარჩებოდა შინაგან საქმეთა სამინისტროსა და რეინტეგრაციის სახელმწიფო მინისტრთა აპარატშიც.

საერთოდაც გატრუნვას ამჯობინებდნენ, არც კი გაფაჩუნდებოდნენ ეს უწყებები, არამცთუ პროტესტი განეცხადებინათ რუსეთის მედია თრუსოს ხეობას ოსების ისტორიულ სამშობლოდ რომ მოიხსენიებს და ამით ახდილად გამოხატავს, მის მისაკუთრებასაც რომ ლამობს.

მართალია ამ ხეობაში ერთხანს ოსებიც ცხოვრობდნენ, მაგრამ არც ტერიტორიუილად და არც კულტურულად თრუსოს მიდამოები მათი კუთვნილება არასოდეს ყოფილა.

თრუსოს ხეობა არის ერთ-ერთი, ჯერაც კარგად შემონახული, გვიან შუა საუკუნეთა ტიპური მთის საცხოვრებელ კომპლექსთა მთელი მუზეუმი.

სამწუხაროდ ეს მუზეუმი თვალდათვალ ინგრევა და დროულად თუ არ ეშველა, ხელიდან გაგვიქრება.

მის შესანარჩუნებლად პირველადი და განუმეორებელი სახით თავგამოდებით იღვწის არასამთავრობო ორგანიზაცია „ლომეკი“, რომელმაც აღწერა ამ ხეობაში არსებული დიდძალი კულტურის ძეგლები და საზაფხულო ბანაკიც მოაწყო, რათა ახალგაზრდებს საშუალება მისცემოდათ, თავიანთი თვალით დაეთვალიერებინათ ეს ყველაფერი, განეცადათ და შემდგომი შესწავლის სურვილიც გასჩენოდათ.

„ლომეკი“ თავს არ ზოგავს აქაურობის შესანარჩუნებლად, მაგრამ მარტო რას გაწვდება, თუ არა სახელმწიფო პოლიტიკა, თავის თავზე რომ აიღებს თრუსოს ხეობის ისტორიული სახის შენარჩუნებას, თორემ დათმობით ხომ არ უნდა დაუთმობდეს თვითმარქვია შთამომავლებს.

საამისო სურვილი კი არსად კრთის ხელისუფლებასა თუ მმართველ პარტიაში, დუმილს რომ ამჯობინებენ, არადა ესეც ის დუმილია, რაც დანაშაულის ტოლფასია,“- განაცხადა როსტომ ჩხეიძემ.