პოლიტიკა

ეს იყო ზეწოლა ჩემი ოჯახის წევრზე, რომელიც გააჩერეს ქუჩაში და მის სახლში ჩაატარეს ჩხრეკა ყოველგვარი სასამართლოს დადგენილების გარეშე - გიორგი მარგველაშვილი

პრეზიდენტ გიორგი მარგველაშვილის განცხადებით, მისი ოჯახის წევრი ყოველგვარი სასამართლო დადგენილების გარეშე გაჩხრიკეს.

როგორც პრეზიდენტმა დღეს გამართულ პრესკონფერენციაზე აღნიშნა, ეს ფაქტი იყო მინიშნება მისი ოჯახსი წევრზე ზეწოლის მცდელობისა.

,,ეს იყო ზეწოლა ჩემი ოჯახის წევრზე, რომელიც გააჩერეს ქუჩაში და მერე მის სახლში ჩაატარეს ჩხრეკა ყოველგვარი სასამართლოს დადგენილების გარეშე, რაღაც იმედით, რომ ამას რაღაც მოჰყვებოდა. ბუნებრივია, სუფთა იყო ყველაფერი და არანაირი სამართლადარღვევა იქ არ იყო, მაგრამ იყო გარკვეული მინიშნებები, რომ ეს არის სწორედ ამ პიროვნებაზე ზეწოლის მცდელობა’’, - განაცხადა მარგველაშვილმა.

პრეზიდენტის თქმით, მსგავსი ტიპის ზეწოლა მისთვის ,,სასაცილოა.’’

,,ამის თაობაზე საზოგადოება არ შევაწუხე, იმიტომ, რომ ბუნებრივია, ასეთი ტიპის ზეწოლა ჩემთვის სასაცილოა. სააკაშვილის პერიოდი მაქვს გამოვლილი და ეს მე ვერანიარად ვერ შემეხებოდა, მაგრამ როდესაც ვნახე, რომ ეს ტენდენცია ღრმავდება, თუნდაც საკონსტიტუციო სასამართლოს მიმართ, მე ეს თემა გამოვიტანე საჯაროდ’’, - აღნიშნა პრეზიდენტმა.

მისი თქმით, საკონსტიტუციო სასამართლოს მოსამართლეებზე ზეწოლის ფაქტებთან დაკავშირებით გიორგი პაპუაშვილის განცხადების გამო, ის არ გაოცებულა.