საზოგადოება

ე.წ ბერძნების სოფელში ჩამოსახლებული ეკომიგრანტები მთავრობისგან დახმარებას ითხოვენ

წალკის მუნიციპალიტეტის სოფელ ხარებაში რამდენიმე სოფლის მოსახლეობა მერს უყურადღებობაში ადანაშაულებს. ადგილობრივების თქმით, 20 წლის წინ ისინი აჭარიდან ჩამოასახლეს და ე.წ ბერძნების სოფელში დაასახლეს, მათ აქვთ ეკომიგრანტის სტატუსი, თუმცა არ არიან სახლების კანონიერი მფლობელები.

სოფლის მაცხოვრებელთა თქმით, ბერძნებმა, რომლებიც სახლების მესაკუთრეები არიან, დაიწყეს დაბრუნება და ახლა მათ გამოსახლება ემუქრებათ. მოქალაქეები ხელისუფლებისგან ან იმ სახლების გამოსყიდვას ითხოვენ, სადაც ამჟამად ცხოვრობენ, ან სოფელ ხარებასთან ახლოს, მიწის ნაკვეთებზე ახალი სახლების აშენებაში დახმარებას თხოვენ.

„გვაქვს აქვე ახლოს მიწის ნაკვეთები დარეგისტრირებული. ან იაფი კრედიტი მოგვცენ, ან საშენი მასალის ყიდვაში მოგვეხმარონ, დანარჩენს ჩვენ მივხედავთ ყველაფერს. გვესმის, რომ მესაკუთრეები ბერძნები არიან, მაგრამ ხომ არ შეიძლება, ჩვენ ქუჩაში დაგვტოვონ. თან თითქმის ყველა ოჯახს გვაქვს ეკომიგრანტის სტატუსი, რასაც ჩვენი მერი არაფრად არ მიიჩნევს“, – განაცხადეს აქციის მონაწილეებმა.

ადგილობრივმა მოსახლეობამ პრემიერ-მინისტრისგან წალკის მუნიციპალიტეტის მერისა და მისი მოადგილის თანამდებობიდან გათავისუფლება მოითხოვა.