სამართალი
ე.წ. ციანიდის საქმესთან დაკავშირებით ირაკლი ფირცხალავას წინასასამართლო სხდომა დღეს გაიმართება
ე.წ. ციანიდის საქმესთან დაკავშირებით კრიმინალური პოლიციის ხელმძღვანელის ყოფილი მოადგილის, ირაკლი ფირცხალავას წინასასამართლო სხდომა დღეს გაიმართება.
საუბარია ფირცხალავას მიერ ე.წ ციანიდის საქმის მთავარი მოწმის ირაკლი მამალაძის აგენტობაში დადანაშაულებაზე.
პროკურატურა ფირცხალავას ჩვენების მიცემაზე უარის თქმას ედავება.
დაცვის მხარე კი, ძიების შეწყვეტას მოითხოვს.
„გაიმართება ციანიდის საქმის ერთ-ერთი მოწმის ირაკლი ფირცხალავს ჩვენების მიცემაზე უარის თქმისათვის სასამართლო პროცესი, სადაც დავასაბუთებთ ხსენებული ბრალდების პოლიტიკურ მოტივირებულობასა და აბსურდულობას. შესაბამისად, ვიშუამდგომლებ სასამართლოს წინაშე, რათა ჩემი დაცვის ქვეშ მყოფის მიმართ შეწყდეს სისხლის სამართლებრივი დევნა“,- განაცხადა ირაკლი ფირცხალავას ადვოკატმა დავით ცინცქალაძემ.
ირაკლი ფირცხალავამ ივნისში საპატიმროდან მედიას წერილი გამოუგზავნა, სადაც საუბრობს, რომ ე.წ ციანიდის საქმის მთავარი მოწმე ირაკლი მამალაძე სუს-ის აგენტია.
მისი მტკიცებით, „ირაკლი მამალაძე გადაბირებულ იქნა ქართული სპეცსამსახურების მიერ ფსევდონიმით „პრესა“. მას აქტიურად იყენებდა კუდ-ი მასმედიაში მიმდინარე მოვლენებზე ინფორმაციის მისაღებად; საპატრიარქოში მიმდინარე მოვლენებზე ინფორმაციის მისაღებად და ლგბტ პირებზე მაკომპრომეტირებელი მასალების მოპოვებისთვის. მათ შორის, პირადი ცხოვრების ამსახველი კადრების მოპოვებისთვის. იგი იყო ე.წ. აგენტ-პროვოკატორი, რომელსაც ეძლეოდა კონკრეტული დავალება. პროკურატურისა და თვითონ მამალაძის მტკიცება რაღაც უბედურების თავიდან აცილებაზე, არის სუფთა ფარსი და არანაირად არ წარმოადგენს სიმართლეს".
მონიკა დავლიანიძე