პოლიტიკა
ეუთოს საპარლამენტო ასამბლეის ჩატარებით, საქართველო საერთაშორისო პოლიტიკურ ცენტრად იქცევა - ირაკლი სესიაშვილი
საქართველოს პარლამენტის თავდაცვისა და უშიშროების კომიტეტის თავჯდომარის ირაკლი სესიაშვილის განცხადებით, ის ფაქტი, რომ თბილისში ეუთოს საპარლამენტო ასამბლეის სესია გაიმართება, ნიშნავს, რომ საქართველო საერთაშორისო პოლიტიკურ ცენტრად იქცევა.
ამის შესახებ სესიაშვილმა ჟურნალისტებს განუცხადა.
„ეს ყველაფერი ადასტურებს იმას და ხაზს უსვამს, რომ საქართველო იქცევა საერთაშორისო პოლიტიკურ ცენტრად და ჩვენ, რა თქმა უნდა, მივესალმებით იმ დიდ ინტერესს, რასაც ეუთოს და ნატოს საპარლამენტო დელეგაციების წარმომადგენლები გამოხატავენ საქართველოს მიმართ. თავისთავად ცხადია, როდესაც საქართველოში ტარდება ასეთი ღონისძიებები ინტერესები, თემები, რა თქმა უნდა, უმეტეს წილად დაუკავშირდება საქართველოს და ესეც ერთგვარი ჩვენი პირდაპირი პოლიტიკური ინტერესებია“,-განაცხადა სესიაშვილმა.
შეგახსენებთ, რომ თბილისში 1-5 ივლისს ეუთოს საპარლამენტო ასამბლეის, 25-ე სესია გაიმართება.
სესიაზე ეუთოს 57 წევრი ქვეყნის 700-მდე წევრი მიიღებს მონაწილეობას, რომლებიც საპარლამენტო ასამბლეის საკომიტეტო და პლენარულ სხდომებზე პოლიტიკურ, ეკონომიკურ, ტექნოლოგიურ, ეკოლოგიურ, ადამიანის უფლებათა დაცვისა და მედიის თავისუფლების საკითხებზე მოხსენებებს გაეცნობიან და შესაბამის რეზოლუციებს მიიღებენ.
ეუთოს ასამბლეა პრეზიდენტის არჩევით და ”თბილისის დეკლარაციის” მიღებით დასრულდება, რომელშიც ასამბლეის მნიშვნელოვანი განცხადებები, პოლიტიკური რეკომენდაციები და გზავნილები იქნება ასახული.
მონიკა დავლიანიძე