საზოგადოება

ევროპის საინვესტიციო ფონდსა და პროკრედიტ ბანკს შორის ხელშეკრულებას ხელი მოეწერა - ქართული მცირე და საშუალო საწარმოებისთვის 50 მილიონი ევრო გამოიყო

ევროპის საინვესტიციო ფონდმა და პროკრედიტ ბანკმა ხელი მოაწერეს InnovFin-ის ხელშეკრულებას, რომელიც ითვალისწინებს საქართველოში სესხების გაცემას მოქმედ ინოვაციურ ბანკებზე. შეთანხმების თანახმად, InnovFin-ის გარანტია ფარავს პროკრედიტ ბანკი საქართველოს მიერ გაცემული თითოეული სესხის 50%-ს, ასევე გათვალისწიენებულია 50 მილიონი ევროს საკრედიტო პორტფელის გენერირება.

ევროკომისარის კვლევის, მეცნიერებისა და ინოვაციის განვითარების საკითხებში კარლოს მოედასმის განცხადებით, აღნიშნული ინიციატივა ეფუძნება ევროკავშირის კვლევისა და ინოვაციის პროგრამა „ჰორიზონტ 2020“-ს, რომელიც ითვალისწინებს კრედიტის გაცემას ევროკავშირის გარანტიის საფუძველზე.

„ჩვენი კვლევისა და ინოვაციის პროგრამა „ჰორიზონტი 2020“ ღიაა მსოფლიოსთვის. ურთიერთობა აღმოსავლეთ ევროპის ქვეყნებთან, ამჯერად საქართველოსთან, ჩვენი სტრატეგიის მნიშვნელოვან ნაწილს წარმოადგენს. დადებული გარიგება ჩვენს თანამშრომლობას ერთი ნაბიჯით წინ წასწევს. ეს დაეხმარება საქართველოს ეკონომიკას, რადგან ქართულ კომპანიებს უკვე ექნებათ შესაძლებლობა ისარგებლონ ევროკავშირის გარანტიის საფუძველზე გაცემული სესხებით, რაც აამაღლებს მათი კვლევისა და ინოვაციის პოტენციალს“, - განაცხადა ევროკომისარმა.

პროკრედიტ ბანკ საქართველოს დირექტორის, ალექს მატუას თქმით, InnovFin-ის პროგრამა ორიენტირებულია მცირე და საშუალო საწარმოებებზე, რომლებიც ევროპულ სტანდარტებს პასუხობენ.

„InnovFin-ის პროგრამა ძალიან მნიშვნელოვანია პროკრედიტ ბანკი საქართველოსთვის, რადგან ის საშუალებას გვაძლევს, უფრო განვვითარდეთ და დავაფინანსოთ ისეთი ბიზნესები, რომელიც ქვეყნის ეკონომიკის ბირთვს წარმოადგენს. ჩვენ ორიენტირებულები ვართ მცირე და საშუალო საწარმოებზე, რომლებსაც აქვთ ინოვაციური ხედვა, პასუხობენ თანამედროვე ევროპულ სტანდარტებს და გეგმავენ მომავალში განვითარებას. ჩვენ ვართ ფინანსური ინსტიტუტი, რომელიც ყოველთვის მხარს დაუჭერს ასეთ ბიზნესს“, - განაცხადა მატუამ.

პროკრედიტ ჰოლდინგის დირექტორთა საბჭოს წევრმა ბორისლავ კოსტადინოვმა აღნიშნა, რომ ეს პროგრამა მცირე და საშუალო საწარმოებს „გაუადვილებს დაფინანსების მიღებას“. მან ასევე დაამატა, რომ 2016 წლის გამოყოფილი თანხიდან ერთი-მესამედი უკვე ათვისებულია ინოვაციური კომპანიების მხარდამჭერი პროექტებისთვის.

როგორც აღინიშნა, ეს პირველი შემთხვევაა, როცა საქართველოში InnovFin-ის ტიპის ხელშეკრულება გააფორმეს.

ცნობილია, რომ „ევროკავშირის InnovFin დაფინანსება ნოვატორებისთვის“ ინიციატივის საფუძველზე, რომელიც შემუშავდა ევროკავშირის კვლევისა და ინოვაციის პროგრამის „ჰორიზონტი 2020“ ფარგლებში, შეიქმნა InnovFin SME Guarantee Facility. ის გასცემს ვალის დაფინანსების გარანტიებს და კონტრგარანტიებს 25 ათასიდან 7.5 მილიონი ევროს ფარგლებში, რომლის მიზანია ინოვაციური მცირე და საშუალო ბიზნესების, ასევე მცირე კაპიტალიზაციის საწარმოების (სადაც დასაქმებულია 499-მდე თანამშრომელი) გაუმჯობესებული პირობებით დაფინანსება. აღნიშნულ ინსტრუმენტს მართავს ევროპის საინვესტიციო ფონდი, რომელიც განვითარდა ფინანსური შუამავლების - ბანკების და სხვა ფინანსური დაწესებულებების - საშუალებით ევროკავშირის წევრ სახელმწიფოებში და ასოცირებულ ქვეყნებში. ამ ინსტრუმენტის საფუძველზე, ევროკავშირი და ევროპის საინვესტიციო ფონდი გასცემს გარანტიებს ფინანსური შუამავლებისთვის იმ ზარალის პროპორციულად, რომელსაც გაწევენ ამ ინსტრუმენტის ფარგლებში ვალის დაფინანსებაზე.

ანა მებურიშვილი