უახლესი ამბები
არქივი
პოლიტიკა
„ევროპული საქართველო“ პარლამენტში განათლების მინისტრს იბარებს - დაბარების ერთ-ერთი მიზეზია ზუგდიდის მე-6 საჯარო სკოლის დირექტორის საქმე
„ევროპული საქართველოს“ ერთ-ერთი ლიდერის, ოთარ კახიძის განცხადებით, განათლების სამინისტროს ინსპექტირების სამმართველოს თანამშრომლების ზეწოლის გამო ზუგდიდის მე-6 საჯარო სკოლის დირექტორ ია კერზაიას ინსულტი დაემართა.
„ქართული ოცნების" პოლიტიკური დაკვეთის შესასრულებლად ზუგდიდის მე-6 საჯარო სკოლის დირექტორზე, ქალბატონ ია კერზაიაზე ზეწოლა განახორციელეს განათლების სამინისტროს ინსპექტირების სამმართველოს თანამშრომლებმა, ნოდარ წამალაშვილმა და ელისო ჯაფარიძემ. მათ აბსოლუტურად უკანონოდ და სამსახურეობრივი უფლებამოსილების გადამეტებით აწარმოეს საპროკურორო სტილის დაკითხვები პირველ და მეორე ტურებს შორის ზუგდიდის მე-6 საჯარო სკოლის თანამშრომლებსა და ამ სკოლის დირექტორზე. ეს ქმედებები საჭიროებს დამატებით შესწავლასა და რეაგირებას პროკურატურის მხრიდან, ვინაიდან სახეზეა სისხლის სამართლის დანაშაული ამ ორი ადამიანის მიერ. ქალბატონი ია უმძიმეს, კომატოზურ მდგომარეობაში იმყოფება რეანიმაციაში“, - განაცხადა კახიძემ პარტიის ოფისში გამართულ ბრიფინგზე.
მან მოუწოდა განათლების მინისტრ მიხეილ ბატიაშვილს, გამოცხადდეს პარლამენტი, „ევროპული საქართველოს" ფრაქციების გაერთიანებულ სხდომაზე კითხვებზე პასუხის გასაცემად.
„კითხვები არსებობს როგორც ამ, ისე სხვა უამრავ საქმეზე, სადაც ადმინისტრაციული რესურსის გამოყენებით „ქართული ოცნება" ცდილობდა ამ არჩევნებზე სალომე ზურაბიშვილის მხარდაჭერის მიღებას სკოლის დირექტორებისგან და პედაგოგებისგან. ჩვენ ვსვამთ როგორც ინსპექტირების სამსახურის სამმართველოს უფროსის, ასევე შიდა აუდიტის დეპარტამენტის უფროსის პასუხისმგებლობის საკითხს, ვინაიდან დაუშვებლად მიგვაჩნია პოლიტიკურ პროცესში განათლების სისტემის, მასწავლებლებისა და სკოლების ადმინისტრაციის გამოყენება“,- განაცხადა კახიძემ.
ცნობისთვის, რამდენიმე დღის წინ კერზაიამ პოლიტიკურ ანგარიშსწორებაზე ისაუბრა. კერძოდ, მან უარი თქვა პედაგოგების საარჩევნო პროცესში ჩართვაზე. მისივე ნაამბობიდან ირკვევა, რომ ამის შემდეგ მას ანონიმური წერილის საფუძველზე გენერალურმა ინსპექციამ თბილისიდან ზუგდიდში ორი თანამშრომელი გაგზავნა და მეექვსე სკოლის შემოწმება დაავალა.
26 ნოემბერს ია კერზაიას შვილმა, ბაჩანა შენგელიამ ფეისბუკზე პოსტი გამოაქვეყნა, რომელშიც მან სკოლაში ინსპექტორების შესვლას პოლიტიკურ ანგარიშსწორებად შეაფასა. მისი თქმით, განათლების სამინისტროს ინსპექტირების სამსახურის ორი თანამშრომელი ერთი კვირის განმავლობაში შემოწმების მაგივრად „ჩვეულებრივ რეპრესიას“ ახორციელებდა. შენგელიას განცხადებით, ამ დროის განმავლობაში პარალიზებული იყო სასწავლო პროცესი, მიმდინარეობდა პედაგოგებისა და სკოლაში დასაქმებული თანამშრომლების დაკითხვა.
მისივე თქმით, ეს ყველაფერი იმიტომ ხდებოდა, რომ დედამისი მიუხედავად არაერთი „შეთავაზებისა“, არ გახდა „ქართული ოცნების“ აქტივისტი და არჩევნების წინ არ გადასცა მათ ე.წ. მომხრეების სია.
ია კერზაია ამ დრომდე ქუთაისის ინტერვენციული მედიცინის ცენტრის რეანიმაციულ განყოფილებაში რჩება. ის მართვით სუნთქვაზე კომატოზურ მდგომარეობაშია.