საზოგადოება
„ევროპული საქართველო“ პარლამენტში ნარკოპოლიტიკის ფუნდამენტური შეცვლის ინიციატივით გამოვა - ოთარ კახიძე
საპარლამენტო ფრაქცია „ევროპული საქართველოს“ წევრის, ოთარ კახიძის განცხადებით, მისი პარტია ინიციატივის წარდგენას აპირებს, რომელიც ითვალისწინებს ქვეყნის ნარკოპოლიტიკის შეცვლას.
„ჩვენ შევდივართ პარლამენტში ინიციატივით, რომ ნარკოტიკების მომხმარებელთა მიმართ პოლიტიკა ფუნდამენტურად შეიცვალოს. აქ არ იგულისხმება, რა თქმა უნდა, გასაღების მიზანი. ჩვენთვის მნიშვნელოვანია, დაცული იყოს საზოგადოებრივი წესრიგი, მაგრამ ეს უნდა მოხდეს იმგვარად, რომ, რაც შეიძლება ნაკლები ადამიანი წავიდეს ციხეში და პატიმრობა, როგორც თავისუფლების აღკვეთა არ იყოს გამოყენებული სასჯელად“, - განაცხადა კახიძემ.
კახიძის აზრით, კანონმდებლობა სხვა მძიმე დანაშაულებთან შედარებით ზედმეტად მკაცრია ნარკომომხმარებლების მიმართ.
„ჩვენ გვაქვს არაორდინალური სიტუაცია. პრაქტიკულად, დრაკონული სისხლის სამართლის კანონმდებლობა, რომელიც ითვალისწინებს, მაგალითად გაუპატიურებისთვის 6-დან 8 წლამდე თავისუფლების აღკვეთას, ყაჩაღობისთვის 5-დან 7 წლამდე თავისუფლების აღკვეთას, ამბოხებისა და შეთქმულებისთვის კონსტიტუციური წყობილების შესაცვლელად 5-დან 8 წლამდე თავისუფლების აღკვეთას და ამ პირობებში, კლუბური ნარკოტიკის ფლობისთვის ახალგაზრდებს 8 წლით თავისუფლების აღკვეთას უსჯიან. ეს მიდგომა არის გადასახედი. სისხლის სამართლის კოდექსი საჭიროებს ფუნდამენტურ გადახედვას“, - განაცხადა კახიძემ.
ანა მებურიშვილი