საზოგადოება

„ევროპული საქართველო“ ზაზა სარალიძეს თავდებში უდგება

საპარლამენტო უმცირესობა ზაზა სარალიძეს თავდებში უდგება. შესაბამისი განცხადება „ევროპული საქართველოს“ საპრეზიდენტო კანდიდატმა - დავით ბაქრაძემ პარტიის ცენტრალურ ოფისში გამართულ ბრიფინგზე გააკეთა.

ბაქრაძემ პირადად შს მინისტრ გიორგი გახარიას და ხელისუფლებას მიმართა, გაითვალისწინოს ,,ევროპული საქართველოს" წევრი დეპუტატების თავდებობა და სარალიძე პატიმრობიდან გაათავისუფლოს.

მისი თქმით, თავდებობა უახლოეს მომავალში როგორც ადვოკატებთან, ისე ოჯახის წევრებთან ერთად, დოკუმენტურად გაფორმდება.

„იმ ადამიანის დაპატიმრება, რომელიც 5 თვეზე მეტია ეძებს სიმართლეს, ცდილობს იპოვოს მისი შვილის მკვლელები და მათი მფარველები, ეს სცილდება სამართლებრივ და პოლიტიკურ ჩარჩოებს და წარმოადგენს მორალურ ტესტს ჩვენი საზოგადოებისთვის.

ჩვენი საზოგადოების და თითოეული ჩვენგანის ვალდებულებაა, არ დავუშვათ იმ ადამიანის დაპატიმრება, რომელსაც ებრძვის სახელმწიფო, უსამართლოდ ექცევა სისტემა და ვისი ოჯახიც არის მსხვერპლი იმ უზნეობის, რომელიც ჩამოაყალიბა „ქართულმა ოცნებამ“.

სწორედ ამიტომ, ჩვენ, საპარლამენტო უმცირესობის წევრები გამოვდივართ ინიციატივით და მზად ვართ თავდებში ჩავუდგეთ ზაზა სარალიძეს, რათა დაუყოვნებლივ იქნას გათავისუფლებული. მოვუწოდებ შს მინისტრს, პირადად ბატონ გახარიას, გაითვალისწინოს ჩვენი თავდებობა და მოვუწოდებ ხელისუფლებას, გაითვალისწინოს პარლამენტის წევრების თავდებობა“, - განაცხადა დავით ბაქრაძემ.

ცნობისთვის, გუშინ, ზაზა სარალიძე პოლიციისთვის ფიზიკური შეურაცხყოფის მიყენების ბრალდებით დააკავეს. მოგვიანებით ზაზა სარალიძე საავადმყოფოში გადაიყვანეს.