კონფლიქტის ზონა

ფაქტობრივად დაცლილი ცხინვალის იზოლაციას აკეთებენ - ქეთევან ციხელაშვილი

საოკუპაციო ზოლზე, სოფელ ატოცში, სადაც რუსი ოკუპანტები უკანონო ბორდერიზაციას ეწევიან, სახელმწიფო მინისტრი შერიგებისა და სამოქალაქო თანასწორობის საკითხებში, ქეთევან ციხელაშვილი ჩავიდა.

ციხელაშვილი პირადად გაეცნო სოფელში მიმდინარე ვითარებას და განაცხადა, რომ ოკუპანტების ეს ქმედება პროვოკაციის მახინჯი ფორმაა.

მისი თქმით, ხელისუფლება გააკეთებს ყველაფერს, რათა შეჩერდეს ეს პროცესი.

ციხელაშვილის განცხადებით, ახალი მავრთულხლართების გავლებით, კიდევ უფრო გართულდება ოკუპირებულ რეგიონებში მცხოვრებ ადამიანთა პრობლემები.

„ჩვენ ამას არ შევეგუებით, არ გავტყდებით, კიდევ უფრო გავძლიერდებით და არ შევწყვეტთ ჩვენს მშვიდობიან ბრძოლას, ვიდრე ბოლო მეტრი ამ სამარცხვინო მავთულხლართების არ დაიშლება ჩვენი ქვეყნის ტერიტორიაზე. მე მინდა დღეს აქ ყოფნით ატოცის მოსახლეობის მიმართ გამოვხატო მხარდაჭერა. ჩემი ყოველდღიური საქმიანობა ემსახურება ამ ხალხის ინტერესებს და იმ ხალხის ინტერესებს, ვინც არის დაზარელებული ამ მავთულხლართების პოლიტიკით.

დღეს რასაც აკეთებენ ესენი, ეს არის, რომ შემოსაზღვრონ სამხედრო გეტო, სადაც ცხოვრობს 20-30 ათასი მოსახლე, ფაქტობრივად დაცლილი ცხინვალის იზოლაციას აკეთებენ და მათთვის, ვინც იქ არის დარჩენილი, ქმნიან გაუსაძლის პირობებს,“-განაცხადა ციხელაშვილმა.