საზოგადოება

ფაროსანას წინააღმდეგ ბრძოლის პროცესში, მოსახლეობამ მექანიკური მეთოდებიც უნდა გამოიყენოს - სურსათის ეროვნული სააგენტო

აზიური ფაროსანა, ტემპერატურის კლებასთან ერთად, საცხოვრებელი სახლებისა და შენობებისკენ ეტაპობრივად იწყებს გადაადგილებას. მავნებელი ახლომდებარე დასახლებებისკენ გადაადგილდება ტყის მასივებიდანაც.

სურსათის ეროვნული სააგენტოს ინფორმაციით, ვინაიდან, ტყის მასივებში ქიმიური ღონისძიებების ჩატარება კანონმდებლობით აკრძალულია, სურსათის ეროვნული სააგენტოსა და ეროვნული სატყეო სააგენტოს მიერ, ტყისპირა პერიმეტრებზე მავნებელთან ბრძოლა „მოიზიდე და გაანადგურე“ სადგურების მეშვეობით ხორციელდება. თუმცა, პარალელურად, მნიშვნელოვანია ტყიდან გამოსული ფაროსანას მექანიკური ღონისძიებებით, მათ შორის, დამჭერი ხაფანგებით განადგურება.

მექანიკურ მეთოდებთან დაკავშირებული ინფორმაციის გავრცელების მიზნით, საკოორდინაციო შტაბისა და სურსათის ეროვნული სააგენტოს წარმომდგენლები მოსახლეობასთან შეხვედრებს ყოველდღიურ რეჟიმში მართავენ.

მექანიკური მეთოდები გულისხმობს:

1. მუყაოს ან სხვა მასალის ყუთის ფორმის მარტივ კონსტრუქციებს, რომლებიც თავსდება საცხოვრებელი სახლების მახლობლად, მშრალ, მზიან ადგილას. ამ გზით შესაძლებელია გამოზამთრების ადგილის მაძიებელი მავნებლის მოზიდვა და შემდგომ მისი განადგურება.

2. სახლებში შესული ფაროსანას მტვერსასრუტით შეგროვება და განადგურება.

3. ე.წ. „მოიზიდე და გაანადგურე“ მეთოდი. ინსექტიციდით გაჟღენთილი ბადე ან ქსოვილი თავსდება საცხოვრებლის პერიმეტრზე, სადაც მავნებლის მოზიდვის მიზნით, მაგრდება ნათურა ან ფერომონი. ბადესთან კონტაქტის შედეგად, მავნებელი კვდება.

აზიურ ფაროსანასთან ბრძოლის ღონისძიებები სახელმწიფო სტრატეგიის შესაბამისად მიმდინარეობს. მონიტორინგის შედეგების მიხედვით იმ ტერიტორიებზე, სადაც მავნებლის რიცხოვნობა მაღალია, შეწამვლის სამუშაოები სურსათის ეროვნული სააგენტოს სპეციალიზებული ტექნიკით ტარდება. თერმული ნისლის ტექნოლოგიითა და ცივი შესხურებით 700 ათას ჰექტრამდე ფართობია დამუშავებული. სახელმწიფოს მიერ მავნებლის საწინააღმდეგო ღონისძიებები ოქტომბრის ბოლომდე გაგრძელდება. 2018 წელს ჩატარებული ღონისძიებების შედეგად, აზიური ფაროსანა არ გავრცელდა აღმოსავლეთ საქართველოში, დასავლეთ საქართველოში კი, მისი რიცხოვნობა შემცირებულია.