უახლესი ამბები
არქივი
ეკონომიკა
ფინანსთა მინისტრის მოადგილე მოქალაქეებს სესხების ლარიზაციის პროგრამაში ჩართვას ურჩევს
საქართველოს ფინანსთა მინისტრის მოადგილე ნიკოლოზ გაგუა მოქალაქეებს ურჩევს, დროულად გამოიყენონ სესხების ლარიზაციის პროგრამა. მისი თქმით, აღნიშნულ პროგრამას პირველივე დღეს ბევრი ადამიანი გამოეხმაურა.
„პროგრამის პირველივე დღეს იმდენად დიდი იყო ინტერესი, რომ ბანკებს პროგრამის პოტენციური მონაწილეების 8 პროცენტამდე მიაკითხა. ამდენად, ვფიქრობ, რომ ასეთი დიდი ინტერესი არ არის გამოწვეული უბრალო ცნობისმოყვარეობით, არამედ ხალხში არსებობს რეალური მოთხოვნა, საბანკო მომსახურებას იმ ვალუტით ეწეოდეს, რომელშიც შემოსავალი აქვს. გალარების პროგრამის მთავარი მიზანიც ხომ ისაა, რომ სავალუტო რისკი გადავიდეს მათზე, ვისაც მისი მართვა შეუძლია. რაც შეეხება ფიზიკურ პირებს, მათ ეს შესაძლებლობა ნაკლებად აქვთ“, – აღნიშნავს ფინანსთა მინისტრის მოადგილე.
გაგუას თქმით, სესხების ლარიზაცია მის მომხმარებელს ეხმარება, რომ მათი ე.წ. განკარგვადი შემოსავალი აღარ იქნება დამოკიდებული კურსთაშორის სხვაობაზე და სესხის მომსახურება იმ ვალუტით შეეძლებათ, რომელშიც აქვთ შემოსავალი.
„ლარში სესხი საშუალებას გვაძლევს არ ვიყოთ სავალუტო კურსზე დამოკიდებული და უზრუნველყოფს მსესხებლის მიერ სესხის მომსახურებაზე გასაწევი დანახარჯების პროგნოზირებადობას და ასევე, როდესაც მსესხებელს შემოსავალიცა და სესხიც აქვს ლარში, ეს უფრო ნაკლებხარჯიანია. მას არ უწევს თანხის გადახურდავება სესხის დაფარვის დღეს და ხშირად აღნიშნულ გადახურდავებასთან დაკავშირებული კონვერტაციის საკომისიოების გადახდა. ყოველივე ეს შეიძლება იყოს საკმაოდ არსებითი (1 პროცენტი ან უფრო მეტიც). შესაბამისად, ეს გარემოება პროგრამას დამატებით მიმზიდველობას სძენს“, – აცხადებს გაგუა.
გაგუა აღნიშნავს, რომ ლარიზაციის რეფორმა მნიშვნელოვანია მდგრადი ეკონომიკური ზრდისთვის. მოადგილე ამბობს, რომ ამას ამტკიცებს იმ ქვეყნების მაგალითი, ვინც წარმატებულად განახორციელეს დედოლარიზაციის პოლიტიკა.
„ლარიზაციის რეფორმაზე მუშაობისას ჩვენ შევისწავლეთ სხვადასხვა წარმატებული ქვეყნის მაგალითები, მათ შორის, ცენტრალური ევროპისა და ლათინური ამერიკის ქვეყნების რამდენიმე წარმატებული მაგალითი. აღნიშნულ ქვეყნებში დედოლარიზაცია გადაიზარდა სწრაფ და მდგრად ეკონომიკურ მატებაში და სწორედ ეს არის ჩვენი მიზანი“, - განაცხადა გაგუამ.
სესხების გალარების პროგრამა 2017 წლის 17 იანვარს დაიწყო და ორი თვის განმავლობაში გაგრძელდება. პროგრამა ეხება ფიზიკურ პირზე 2015 წლის 1-ელ იანვრამდე აშშ დოლარში გაცემულ უძრავი ქონებით უზრუნველყოფილ სესხებს. მთავრობა უზრუნველყოფს სესხების გალარებას შეღავათიანი კურსით, რომელიც შეადგენს კონვერსიის დღეს არსებულ პუნქტს მინუს 20 თეთრი 1 აშშ დოლარზე. სუბსიდია არ შეეხება მაღალი შემოსავლების მქონე პირებს, ანუ, ვისი წლიური შემოსავალი 2015 წელს 100,000 ლარზე მეტი იყო ან ვისი სესხის ნარჩენი ოდენობა აღემატება 100 ათას აშშ დოლარს. აღნიშნულ პროგრამაში მონაწილეობა ნებაყოფლობითია.
ანა მებურიშვილი