საზოგადოება

Freedom House-ის შეფასებით, მედიათავისუფლების მხრივ საქართველო 50 ქულით ნაწილობრივ თავიუსფალი ქვეყანაა

საერთაშორისო არასამთვარობო ორგანიზაცია Freedom House, 2017 წლის მედიის თავისუფლების რეიტინგს აქვეყნებს. ქვეყნები სამ კატეგორიად არიან დაყოფილი: თავისუფალი, ნაწილობრივ თავისუფალი და არათავისუფალი. საქართველომ 0-დან (საუკეთესო) 100 ქულამდე (ყველაზე ცუდი) რანჟირებაში 50 ქულა მიიღო და ნაწილობრივ თავისუფალი ქვეყნების რიგში მოხვდა.

წინა წელთან შედარებით საქართველოში მედიათავისუფლების მაჩვენებელი ერთი ქულით გაუარესდა. ქვეყანამ ერთი ქულით მეტი მიიღო პოლიტიკური გარემოსთვის - 21/40-დან, მაშინ როცა 2016 წელს ამ კრიტერუმით საქართველოს 20 ქულა მიანიჭეს.

საკანომდებლო გარემოსთვის საქართველომ 30-დან ( ყველაზე ცუდი) ქულიდან 13 მიიღო, ხოლო ეკონომიკური გარემოსთვის 30-დან 16 ქულა.

რაც შეეხება რეგიონის ქვეყნებს, სომხეთი (63 ქულით), აზერბაიჯანი(90 ქულით), რუსეთი (83 ქულით) და თურქეთი (76 ქულით) არათავისუფალ ქვეყანათა კატეგორიაში მოხვდნენ, ხოლო უკრაინა (ყირიმის გამოკლებით, რომელიც 94 ქულით არათავისუფალ ქვეყანათა რიცხვში მოხვდა) 53 ქულით ნაწილობრივ თავისუფალი ქვეყანაა.

Freedom House-ის რეიტინგით, მედიათავისუფლების კუთხით ყველაზე კარგი მდგომარეობაა ნორვეგიაში ( 8 ქულა 100-დან).

არასამთავრობოს ანგარიშის თანახმად, პრესის თავისუფლების ხარისხი თავის ყველაზე დაბალ ნიშნულს მიაღწია ბოლო 13 წლის განმვალობაში, რომლის ერთ-ერთი მიზეზი ავტორიტარული რეჟიმების მიერ მედიაზე დამყარებული კონტროლია, რაც ამ ქვეყნების საზღვრებსაც სცდება. იზრდება სახელმწიფოს ჩარევა მედიაგარემოში ისეთ ევროპულ ქვეყნებში, როგორიცაა პოლონეთი და უნგრეთი.

გარდა ამისა, მსოფლიო მოსახლეობის მხოლოდ 13% ცხოვრობს მედიათავისუფალ ქვეყნებში, ხოლო 45% იმ სახელმწიფოებში, სადაც მედიათავისუფლება დაცული არაა. აზერბაიჯანისა და ყირიმის გარდა ტოპ-10 ყველაზე არათავისუფალ ქვეყანათა რიცხვში შედის კუბა, ეკვატორიული გვინეა, ერიტრეა, ირანი, ჩრდილოეთ კორეა, სირია, თურქმენეთი და უზბეკეთი.

ანა მებურისვილი