საზოგადოება

ფსიქიკური სერვისების დაფინანსების ირგვლივ არსებული „აჟიოტაჟის“ უკან კლინიკების ფინანსური ინტერესი დგას - დავით სერგეენკო

ჯანდაცვის მინისტრი დავით სერგეენკო კომენტარი გააკეთა ფსიქიკური ჯანმრთელობის დაფინანსების ირგვლივ არსებულ „აჟიოტაჟზე“.

მისი თქმით, მის უკან კლინიკების ფინანსური ინტერესები იმალება.

სერგეენკომ განაცხადა, რომ მწვავე შემთხვევებისთვის განკუთვნილი ბიუჯეტი არ შემცირებულა.

მინისტრმა თქვა, რომ მხოლოდ დაფინანსების მეთოდოლოგია შეიცვალა, რადგან ძველი საავადმყოფოებს მანიპულაციების საშუალებას აძლევდა. უწყების მონიტორინგის სააგენტოს ანალიზმა გამოავლინა რამდენიმე შემთხვევა, როცა თვის განმავლობაში მწვავე ფსიქიკური ჯანმრთელობის მქონე პაციენტს არაერთხელ უტარებდნენ მკურნალობას დამატებითი ფინანსების მისაღებად.

“მწვავე შემთხვევების მართვის დროს, როდესაც ქრონიკული დაავადება მწვავდება და პაციენტს აქვს მწვავე ფსიქოზი, ასეთ შემთხვევაში, ის აბსოლუტურ უმრავლესობაში საჭიროებს სტაციონარში მკურნალობას. სტაციონარში მკურნალობის ანაზღაურების მეთოდი იყო ერთი შემთხვევის მართვა ფიქსირებულად იმ ერთი თვის განმავლობაში. კლინიკებში ჩვენმა მონიტორინგმა უტყუარად დაადგინა, რომ არცთუ ისე იშვიათ შემთხვევაში, მწვავე ფსიქოზის მქონე პაციენტს სტაციონარიდან წერდნენ დროზე ადრე, ის ამ ერთი თვის განმავლობაში განმეორებით ან განმესამებით შედიოდა იგივე, ან სხვა კლინიკაში, იმისათვის, რომ ამ კლინიკებს, ამ სიტყვის პირდაპირი მნიშვნელობით, გამოეწერათ ზედმეტი თანხა. ამას აკეთებდნენ პაციენტის უსაფრთხოების ხარჯზე.

მინისტრმა ჟურნალისტებთან ასევე აღნიშნა, რომ ფსიქიკური ჯანმრთელობის დაფინანსების ირგვლივ განვითარებული მოვლენებისას სამი ჯგუფი გამოიკვეთა.

“რაც შეეხება ბოლო დღეებში განვითარებულ მოვლენებს, გამოიკვეთა სამი ჯგუფი: ერთი, ადამიანები, რომლებიც რეალურად გულშემატკივრობენ ამ პაციენტებს, თუმცა, არ არიან ყველა დეტალში ჩახედული და ჩვენ სიამოვნებით გავაცნობთ ამ დეტალებს. მეორე, რომლებსაც ამოძრავებთ გარკვეული ხეირი და მესამე, პოლიტიკურად ანგაჟირებული ადამიანები, რომლებმაც ოღონდ რაღაც ნეგატივი წამოწიონ ზემოთ,”- აცხადებს დავით სერგეენკო.

შეგახსენებთ, რომ 23 იანვარს თბილისში, შრომის, ჯანმრთელობისა და სოციალური დაცვის სამინისტროსთან შშმ ბავშვთა მშობლებმა და არასამთავრობო სექტორმა საპროტესტო აქცია გამართეს ფსიქიატრიული სერვისების დახურვის გამო.

აქციის მონაწილეები აპროტესტებდნენ სამინისტროს გადაწყვეტილებას ზოგადი პროფილის საავადმყოფოებში მწვავე განყოფილებების დახურვის შესახებ, ასევე მწვავე შემთხვევების დაფინანსების 40%-ით შეამცირებას.

ანა მებურიშვილი