საზოგადოება

გაბრიელ სალოსის ქუჩაზე აქციის მონაწილეების მიერ გადაკეტილი გზა თავისფალია

თბილისში, ბერი გაბრიელ სალოსის ქუჩაზე სამართალდამცველებმა აქციის მონაწილეების გზის სავალი ნაწილი დაატოვებინეს.

109-ე ბაგა-ბაღის აღსაზრდელების მშობლებმა და პედაგოგებმა ბერი გაბრიელ სალოსის ქუჩა ცოტა ხნის წინ თბილისის მერთან შეხვედრის, ბაღში სასწავლო პროცესი აღდგენისა და ბაღში გამაგრებითი სარემონტო სამუშაოების ჩატარების მოთხოვნით გადაკეტეს.

ოფიციალური ინფორმაციით, 18 აპრილიდან ბაღი სამხარაულის ექსპერტიზის ბიუროს საექსპერტო დასკვნის საფუძველზე იკეტება. თბილისის საბავშვო ბაგა-ბაღების მართვის სააგენტოში აცხადებენ, რომ დასკვნის მიხედვით, N109 ბაგა-ბაღის შენობის ძირითადი ნაწილის ტექნიკური მდგომარეობა არადამაკმაყოფილებელია და საექსპლუატაციო ვარგიასიანობის თვალსაზრისით, მეორე კატეგორიას მიეკუთვნება, რაც იმას ნიშნავს, რომ შენობას გამაგრება სჭირდება.

N109 ბაგა-ბაღში რეგისტრირებული აღსაზრდელები კვირის ბოლომდე ახლომდებარე სამ საბავშვო ბაღში გადანაწილდებიან.

თბილისის მერი კახა კალაძე ინფორმაციას 109-ე ბაგა-ბაღის შენობის გასხვისებასთან დაკავშირებით უარყოფს. მისი თქმით, სამხარაულის ექსპერტიზის ეროვნული ბიუროს დასკვნით, ბაღის შენობა ავარიული და საშიშია, ამიტომ პასუხისმგებლობას ვერ აიღებს,რომ ბაღში სწავლა გაგრძელდეს.

ცირა გურგენიძე