უახლესი ამბები
არქივი
საზოგადოება
გადაგდეს დიმიტრი ქუმსიშვილი - ტყიბულელი მეშახტეების დაღუპვასთან დაკავშირებით თბილისში 17 საათზე მსვლელობა გაიმართება
დღეს, 17 საათზე თბილისის სახელმწიფო უნივერსიტეტის პირველი კორპუსიდან გაიმართება მსვლელობა ტყიბულში, მინდელის შახტში 6 მეშახტის დაღუპვასთან დაკავშირებით.
მსვლელობის ორგანიზატორები, თავის მხრივ, მოითხოვენ, რომ მომხდარის გამო გადადგეს ეკონომიკისა და მდგრადი განვითარების მინისტრი დიმიტრი ქუმსიშვილი და მმართველმა გუნდმა შეცვალოს ეკონომიკური პოლიტიკა.
„2018 წლის გასულ სამ თვეში საწარმოო უბედური შემთხვევების შედეგად, (სხვადასხვა სფეროში) ქვეყნის მასშტაბით სამუშაო ადგილზე გარდაიცვალა 18 და მძიმედ დაშავდა 12 ადამიანი.
2017 წელს 41 გარდაიცვალა და 66 მძიმედ დაშავდა.
აქედან მხოლოდ ტყიბულის მაღაროებში გასულ 15 თვეში გარდაიცვალა 11 ადამიანი.
ტყიბულში მეშახტეები ყოველდღე სასიკვდილო ომში მიდიან. მათ არ იციან, დაბრუნდებიან თუ არა შინ სამუშაო ადგილებიდან. ამასობაში შპს „ჯი აი ჯი"-ის კომპანია და საქართველოს მთავრობა მუშებს, რომლებიც საკუთარი სიცოცხლეს, ჯანმრთელობასა და ღირსებას წირავენ საწარმოს საქმიანობას, ამუშავებენ უკიდურესად მძიმე პირობებში: არაა დაცული უსაფრთხოების ბაზისური გარანტიები, ხელფასები კი ძალიან დაბალია. ტყიბულში მცხოვრები ადამიანებისთვის და ოჯახებისთვის ქვანახშირის მაღარო შემოსავლის ერთადაერთი წყაროა და ისინი იძულებულები არია, გარისკონ საკუთარი თავი ექსპლოატაციისთვის, სიცოცხლისა და დასახიჩრების რისკებისთვის.
4 აპრილს მომხდარ ინციდენტთან დაკავშირებით, კომპანიის ადმინისტრაცია ცდილობს მომხდარი ტრაგედია დააბრალოს მიწის ქანების მოძრაობას და ის უბედურ შემთხვევად შეაფასოს. თუმცა, მიწის ქანების გააადგილების ფაქტი სპეციალისტების მხრიდან არ ფიქსირდება. ამასთან ამ მსჯელობაში უგულებელყოფილია ბუნების დაზიანების ფაქტორი, რომელიც შეიძლება იყოს არსებითი მიზეზი მსგავსი შემთხვევების. ადმინისტრაციას სურს, მომხდარი ტრაგედია არ დაუკავშიროს შრომის პოლიტიკისა და ინდუსტრიულ ზონებში სახელმწიფოს ეკონომიკური პოლიტიკის პრობლემას და გადაფაროს საკუთარი პასუხიმგებლობა და დაასუსტოს პოლიტიკური წინააღმდეგობა.
მშრომელი ადამიანები დღეს საქართველოში განწირულები არიან სიღარიბისთვის, ექსპლუატაციისთვის, დაზიანებისა და გარდაცვალებისთვის. მთავრობის ეკონომიკური ბლოკი ეწინააღმდეგება პროგრესულ პოლიტიკას, რაც მოემსახურება საქართველოში მცხოვრები ადამიანებისა და განსაკუთრებით მშრომელი ადამიანების კეთიდლდღეობასა და სოციალურ სამართლიანობას. ეკონომიკური პოლიტიკა არსებითად გათვლილია ინვესტიციებზე, საიდანაც მიღებული დოვლათი ხმარდება მცირე ეკონომიკურ ელიტებს და არა ადგილობრივ მოსახლეობას.
აღსანიშნავია, რომ ეკონომიკის სამინისტრო პირდაპირ ბლოკავს და შემდეგ აჭიანურებს ქვეყანაში უსაფრთხო და ღირსეული შრომითი პოლიტიკის შემუშავებას. მომხდარ ტრაგედიაზე სრული პოლიტიკური პასუხისმგებლობა ეკისრება მთავრობის ეკონომიკურ ბლოკსა და მის სახეს დიმიტრი ქუმსიშვილს.
მოვითხოვთ:
1.გადაგდეს დიმიტრი ქუმსიშვილი დაკავებული პოლიტიკური თანამდებობიდან და მთავრობის ეკონომიკის გუნდმა არსებითად გადახედოს მის ეკონომიკურ პოლიტიკას. ის უნდა ემსახურებოდეს მოსახლეობის კეთილდღეობას და სოციალურ სამართლიანობას და არა კონკრეტული ბიზნესელიტების ინტერესებს.
2.აუცილებელია ხელისუფლებამ შეიმუშაოს ტყიბულის ეკონომიკური და სოციალური განვითარების ალტერნატიული გეგმა, რაც გულისხმობს ტყიბულის ადგილობრივი ეკონომიკის დივერსიფიცირებას, რაც უზრუვნელყოფს მოსახლეობის ნაკლებად დამოკიდებულებას ქვანახშირის წარმოების სისტემაზე.
მოგიწოდებთ ყველას, რომ ხვალ, 6 აპრილსს, 17:00 საათზე, შემოგვიერთდეთ მსვლელობაზე, რომელიც თსუ-ის პირველი კორპუსიდან პარლამენტისაკენ გაიმართება.
ამგვარი უსამართლობა აღარ უნდა განმეორდეს!“, - წერია განცხადებაში.