კომენტარი

გამობრძანდეს უსაფრთხოების სამსახური და მიუთითოს, რატომ არის ზუგდიდის შემთხვევა ტერორისტული აქტი - ანა დოლიძე

„საერთაშორისო მიდგომებიდან გამომდინარე, ტერორიზმის კვალიფიკაციას აუცილებლად სჭირდება პოლიტიკური კომპონენტი, ეს არის თავდასხმა პოლიტიკურ თანამდებობის პირზე, ან პოლიტიკური მოთხოვნა. ზუგდიდის შემთხვევაში არანაირი ინფორმაცია არ გვქონია პოლიტიკური მიზეზის შესახებ. მძარცველს უნდოდა ქონების მითვისება ძალადობრივი მეთოდებით,“ - განაცხადა ანა დოლიძემ.

დიდუბე-ჩუღურეთის დამოუკიდებელი მაჟორიტარი დეპუტატობის კანდიდატის, ანა დოლიძის შეფასებით, ზუგდიდში „საქართველოს ბანკზე“ თავდასხმის საქმეზე გამოძიების ტერორიზმის მუხლით წარმოება გაუგებარია.

მისივე თქმით, შინაგან საქმეთა სამინისტრო თავს ვერ აბამს ამ საქმის გამოძიებას და არაპროფესიონალურად უმატებენ მუხლს იმისთვის, რომ საქმეში უსაფრთხოების სამსახური ჩაერთოს.

„ან გამოვა უსაფრთხოების სამსახური და იტყვის, თუ როგორ ჰქონდა ამას პოლიტიკური კომპონენტი, ან გამოდის, რომ აბსოლიტურად ზედაპირულად და არაპროფესიონალურად უმატებენ მუხლს მხოლოდ იმისთვის, რომ ამ საქმეში ჩაერთოს უსაფრთხოების სამსახური. გამოდის, რომ შინაგან საქმეთა სამინისტრო თავს ვერ აბამს ამ საქმის გამოძიებას, არავითარი სიურპრიზი ეს ჩვენთვის არ იქნება და არ არის პირველი შემთხვევა, როდესაც უმარტივესი საქმეები ვერ მიჰყავს შინაგან საქმეთა სამინისტროს ბოლომდე. გამობრძანდეს უსაფრთხოების სამსახური და მიუთითონ რატომ არის ეს ტერორისტული აქტი“, - განაცხადა ანა დოლიძემ.