საზოგადოება

გამოძიება არ დაიწყებოდა, კითხვები რომ არ არსებობდეს - ზაქარია ქუცნაშვილი მაჩალიკაშვილის საქმეზე

პარლამენტის წევრის, ზაქარია ქუცნაშვილის განცხადებით, თემირლან მაჩალიკაშვილის დაჭრის ფაქტზე გამოძიება არ დაიწყებოდა, კითხვები რომ არ გაჩენილიყო.

მან აღნიშნა, რომ გამოძიება დაადგენს, იყო თუ არა იარაღის გამოყენების აუცილებლობა.

„რადგან გამოძიება მიმდინარეობს, ეს ნიშნავს, რომ კითხვები არსებობს. გამოძიება არ დაიწყებოდა, კითხვები რომ არ არსებობდეს, მის შედეგებზე იქნება დამოკიდებული პასუხები. მთელი საზოგადოება ვთანხმდებით, რომ კითხვები არსებობს. სწორედ ამის გამო დაიწყო გამოძიება და კითხვებზე პასუხი უნდა გასცეს ამ პროცესმა, ჰქონდა თუ არა იარაღის გამოყენების აუცილებლობას ადგილი, სწორად იყო თუ არა ძალა გამოყენებული“, -თქვა დეპუტატმა.

კითხვას, შეიძლება თუ არა საქმე სტრასბურგის სასამართლომდე მივიდეს, ქუცნაშვილმა უპასუხა, რომ ეს მაჩალიკაშვილის ოჯახის გადასაწყვეტია.

„ეს მათი უფლებაა და ვერავინ შეუზღუდავს ჩვენს მოქალაქეებს, დაიცვან მათი უფლებები, მათ შორის რეგიონულ სასამართლოებში“, -თქვა პოლიტიკოსმა.

19 წლის თემირლან მაჩალიკაშვილი პანკისის ხეობის სოფელ დუისში სუს-ის მიერ ჩატარებული სპეცოპერაციის დროს თავის არეში დაჭრეს. ის თბილისში წმინდა მიქაელ მთავარანგელოზის სახელობის მრავალპროფილიან კლინიკურ საავადმყოფოში მკურნალობდა. მის გადასაყვანად ჯანდაცვის სამინისტრო და მაჩალიკაშვილის ოჯახი მოლაპარაკებებს აწარმოებდნენ უცხოურ კლინიკებთან.

მაჩალიკაშვილი გუშინ დილით გარდაიცვალა.

ანა მებურიშვილი