საზოგადოება

გამოწვევების შესაბამისად უსაფრთხოების ზომები იქნება საახალწლო დღეებშიც - გიორგი გახარია

შინაგან საქმეთა მინისტრის, გიორგი გახარიას განცხადებით, კონტრტერორისტული სპეცოპერაციის გათვალისწინებით თბილისში უსაფრთხოების ზომები გაძლიერებულია და ასე იქნება საახალწლო დღეებშიც.

„ბოლო დღეებში ანტიტერორისტული სპეცოპერაციის შემდგომ თბილისმა უმასპინძლა ძალიან სერიოზულ, საერთაშორისო დონის ღონისძიებებს. წარმოდგენილი იყო რამდენიმე ქვეყნის ხელმძღვანელი და მინდა, გითხრათ, რომ ჩვენმა შესაბამისმა უწყებებმა საკმაოდ მაღალი დონის კოორდინაციით, ძალიან კარგად გაართვეს თავი მსგავსი ღონისძიების ჩატარებას და ეს ასე გაგრძელდება.

უსაფრთხოების ზომები იქნება, რა თქმა უნდა, იმ დონეზე, რა დონეზეც უნდა ვუპასუხოთ იმ გამოწვევებს, რაც დღეს გვაქვს, მათ შორის საახალწლო დღეებშიც“, - განაცხადა მინისტრმა თბილისის მერ კახა კალაძესთან შეხვედრის შემდეგ.

ისანში, ბერი გაბრიელ სალოსის ქუჩაზე კონტრტერორისტული სპეცოპერაცია 21-22 ნოემბერს ჩატარდა, რომლის შედეგად დაკავებულია 1, ხოლო ლიკვიდირებულია 3 პირი, ასევე დაიღუპა 1 სპეცრაზმელი და დაშავდა 4 სამართალდამცველი.

ანა მებურიშვილი