კომენტარი

გამოვრიცხავ ბიძინა ივანიშვილის მონაწილეობას, რადგან მან უზრუნველყო ქვეყანაში ელიტური კორუფციის დამარცხება - ირაკლი კობახიძე „ომეგას“ საქმეზე

პარლამენტის თავმჯდომარემ ირაკლი კობახიძემ „ომეგა ჯგუფისა“ და ტელეკომპანია „იბერიას“ საქმეზე გამოქვეყნებულ ჩანაწერებზე საუბრისას განაცხადა, რომ მოქმედი ხელისუფლება ქვეყანაში კორუფციას არ დაუშვებს.

„ძალიან ბევრი გვარი გაჟღერდა, ჩვენი ამოცანაა, რომ სადაც კითხვა არსებობს, იმ კითხვებს ჩავეძიოთ და გავცეთ ამ კითხვებს პასუხი. ესაა ჩვენი ამოცანა. კორუფციას ჩვენ , ბუნებრივია, არ დავუშვებთ ჩვენს ქვეყანაში, აქედან გამომდინარე, თუ კორუფციასთან დაკავშირებით სადმე ოდნავი ეჭვი არსებობს, ესაა შესაბამისი ორგანოების საქმე და აუცილებლად საჭიროა ჩაძიება და საჭიროა კითხვებზე პასუხის გაცემა“, -უთხრა კობახიძემ ჟურნალისტებს.

კითხვაზე, გამორიცხავს თუ არა, რომ გარიგებების უკან ბიძინა ივანიშვილი იდგეს, კობახიძემ უპასუხა, რომ გამორიცხავს. მისი მტკიცებით, სწორედ ყოფილი პრემიერის ძალისხმევით მოქმედმა მთავრობამ დაამარცხა ელიტური კორუფცია.

„ამას პირდაპირ ვიტყვი, გამოვრიცხავ! ესაა აბსოლუტურად გამორიცხული, იმიტომ რომ მე ვიცი ბატონი ბიძინა ივანიშვილის პრინციპები, მისი საქმისადმი მიდგომა. ისაა სწორედ ის ადამიანი, რომელმაც უზრუნველყო ჩვენს ქვეყანაში ელიტური კორუფციის დამარცხება. ეს ელიტური კორუფცია ყვაოდა საქართველოში 2012 წლამდე და სწორედ მისი პრინციპების წყალობით რადიკალურად შეიცვალა ჩვენს ქვეყანაში ქვეყნის მართვის პრინციპები. ესაა სწორედ ბიძინა ივანიშვილის დამსახურება, ესაა მისი პრინციების დამსახურება“, - თქვა კობახიძემ.

როცა ჟურნალისტმა ანალოგიური კითხვა დაუსვა დიმიტრი ქუმსიშვილზე, კობახიძემ განაცხადა, რომ ამას პასუხს გამოძიება გასცემს.

„რაც შეეხება ნებისმიერ დანარჩენ გვარს, ეს საქმე ჩასაძიებელია სამართალდამცავი ორგანოების მხრიდან და ჩვენ, პარლამენტი, ჩვენი კომპეტენციის ფარგლებში ასევე დავინტერესდებით ამ საქმით“, - აღნიშნა პარლამენტის თავმჯდომარემ.