საზოგადოება

განათლების მინისტრის განცხადებით, GIPA-ში მიმდინარე პროცესებს პოლიტიკური სარჩული არ გააჩნია

საქართველოს განათლებისა და მეცნიერების მინისტრი მიხეილ ჩხენკელი საქართველოს საზოგადოებრივ საქმეთა ინსტიტუტში (GIPA) მიმდინარე მოვლენებს გამოეხმაურა და აღნიშნა რომ იქ მიმდინარე პროცესებს არავითარი პოლიტიკური სარჩული არ გააჩნია.

მინისტრის თქმით, მნიშვნელოვანია, უნივერსიტეტების ავტორიზაცია და პროგრამების აკრედიტაცია ერთმანეთში არ აირიოს. მისივე თქმით, GIPA-ს პროგრამას აკრედიტაციის ვადა გასული ჰქონდა და პროგრამაზე აკრედიტაციის მინიჭების თაობაზე განაცხადიც გვიან შეიტანა.

„ხარისხის განვითარების ეროვნულმა ცენტრმა, მიუხედავად ამისა, მაქსიმალურად სწრაფად გაიარა ეს პროცესი და იყო მთელი რიგი შენიშვნები. დღეს არის სწორედ პროგრამის აკრედიტაციის საბჭოს სხდომა და საკითხს იქ განიხილავენ. აკრედიტაციისა და ავტორიზაციის პროცესი არ არის სადამსჯელო პროცესი. აქ ამოსავალი წერტილი არის მაღალი ხარისხი და იქ, სადაც შესაძლებელია, რომ კონკრეტული შენიშვნები, კონკრეტული პრობლემები აღმოიფხვრას, მათ რა საკვირველია, არავითარი წინააღმდეგობა არ ექნებათ, პირიქით, ჩვენი ხარისხის განვითარების ეროვნული ცენტრი მჭიდროდ ითანამშრომლებს უნივერსიტეტებთან, როგორც პროგრამების აკრეიტაციის, ისე ავტორიზაციის კუთხით“, – განაცხადა განათლების მინისტრმა.

შეგახსენებთ, რომ განათლების ხარისხის განვითარების ეროვნული ცენტრის აკრედიტაციის საბჭომ , 2018 წელს, 38 პროგრამის აკრედიტაციის საკითხი განიხილა. აქედან 19 პროგრამას სრული აკრედიტაცია მიანიჭა, 7 პროგრამას- პირობითი აკრედიტაცია, ხოლო 12 პროგრამას აკრედიტაციაზე უარი ეთქვა.

აკრედიტაცია ვერ გაიარა საქართველოს ეროვნული უნივერსიტეტის (სეუ), საქართველოს ტექნიკური უნივერსიტეტის, ფიზიკური აღზრდისა და სპორტის სახელმწიფო სასწავლო უნივერსიტეტის, წმ. გრიგოლ ფერაძის თბილისის სასწავლო უნივერსიტეტის, საქართველოს დავით აღმაშენებლის სახელობის უნივერსიტეტის, იაკობ გოგებაშვილის სახელობის თელავის სახელმწიფო უნივერსიტეტის, ბათუმის რუსთაველის სახელმწიფო უნივერსიტეტისა და საქართველოს საზოგადოებრივ საქმეთა ინსტიტუტის (GIPA) გარკვეულმა პროგრამებმა.