საზოგადოება

განათლების სამინისტრომ 67-ე სკოლის დირექტორი სამსახურიდან გაათავისუფლა

განათლებისა და მეცნიერების სამინისტროს შიდა აუდიტმა თბილისის 67-ე საჯარო სკოლაში მუშაობა დაასრულა.

უწყება სკოლაში არსებულ დარღვევებს სამი თვის განმავლობაში სწავლობდა, რის შედეგადაც მთელი რიგი დარღვევები გამოვლინდა.

გამოვლენილი დარღვევების შედეგად, რომლებიც როგორც ქონების განკარგვას, ასევე სკოლის მართვას უკავშირდება, 67-ე სკოლის დირექტორის გათავისუფლების საფუძველი გახდა.

მედიანიუსი საქართველოს განათლებისა და ემცნიერების სამისნიტროს განცხადებას უცვლელად გთავაზობთ.

„საქართველოს განათლებისა და მეცნიერების სამინისტროს შიდა აუდიტმა თბილისის 67-ე საჯარო სკოლაში მუშაობა დაასრულა.

უწყებაში შესული არაერთი საჩივრის საფუძველზე, შიდა აუდიტის დეპარტამენტი, თბილისის 67-ე საჯარო სკოლაში არსებულ დარღვევებს დაახლოებით სამი თვის განმავლობაში სწავლობდა.

შედეგად, გამოვლინდა მთელი რიგი დარღვევები როგორც ქონების განკარგვის, ასევე სკოლის მართვის კუთხით, რაც სკოლის დირექტორის გათავისუფლების საფუძველი გახდა. სამინისტროს შიდა აუდიტის დეტარტამენტის მიერ, სკოლაში ჩატარებული ინსპექტირებით დადგინდა, რომ სკოლის დირექტორი, ხშირ შემთხვევაში, ხელს უშლიდა მანდატურებს საქმიანობაში; სისტემატურად აგვიანებდა გაკვეთილზე; შეუსაბამო ფორმით აწარმოებდა მოსწავლეებთან კომუნიკაციას. ამასთან, მოიჯარეები წლების განმავლობაში უფასოდ სარგებლობდნენ სკოლის მოძრავი ქონებით; სკოლაში არსებული ქონება არ ემთხვეოდა ინვენტარიზაციის შედეგებს და ბოლოს, დარღვევები გამოვლინდა შესყიდვების პროცედურებშიც, რაზეც სკოლას გაფრთხილება ჯერ კიდევ 2016 წელს ჰქონდა მიღებული“,- ნათქვამია უწყების განცხადებაში.

მონიკა დავლიანიძე