საზოგადოება

განმარტებებს გავაკეთებ მას მერე, რაც აუდიტის სამსახურის დასკვნას ვნახავ - დავით ნარმანია

თბილისის მერის დავით ნარმანიას განცხადებით, იგი აუდიტის სამსახურის შუალედურ დასკვნას დაელოდება, და მხოლოდ ამის შემდეგ გააკეთებს განმარტებას.

ამასთან, ნარმანიამ მედიაში გავრცელებულ ინფორმაციას, რომ მერიამ აუდიტის სამსახურის თანამშრომლებს, მიწების გადაცემასთან დაკავშირებით, დოკუმენატციის ნაწილი დაუმალა, „ტყუილი“ უწოდა.

„ეს არის ტყუილი. ნებისმიერი დოკუმენტაცია, რაც ქალაქის მერიაში ინახება, არის შემომწმებლებისთვის ღია, ასე რომ ყველანაირი დოკუმენტაცია, რაც ჩვენ ხელთ გვქონდა, მივეცით სახელმწიფო აუდიტის სამსახურის თანამშრომლებს. შეფასება გაკეთბეულია ექსპერტების მიერ, ამიტომ თბილისის მერია დაელოდება ამ შეფასებას. ნუღარ ჩამეკითხებით სხვა დეტალებს. მე ძალიან მკაფიოდ ვთქვი, რომ განმარტებებს გავაკეთებ მას მერე, რაც ვნახავ დასკვნას“,-აღნიშნა დედაქალაქის მერმა.

აუდიტის სამსახური დღეს გაასაჯაროვებს შუალედურ დასკვნას, სადაც საუბარია მერიაში გარკვეული კორუფციული გარიგების შესახებ, რომელიც გარკვეულ პირებს, ამ შემთხვევაში ყოფილ მთავარ პროკურორს, ოთარ ფარცხალაძეს, მიწების გადაცემის საკითხში პრივილეგირებულ მდგომარეობაში აყენებს.

ამის შესახებ განცხადება, აუდიტის სამსახურის უფროსმა ლაშა თორდიამ გააკეთა.

მონიკა დავლიანიძე