კომენტარი

გელა დუმბაძე უკრაინიდან დეპორტირებული ქართველების საკითხზე ქვეყნის საზღვრის და საემიგრაციო სამსახურის უფროსებს შეხვდება

უკრაინაში საქართველოს ელჩის გელა დუმბაძის განცხადებით, უკრაინიდ გაძევებული საქართველოს მოქალაქეების შესახებ კომუნიკაცია ქონდა შესაბამის უწყებებთან.

მისი თქმით, საკითხთან დაკავშირებით უკრაინის საგარეო საქმეთა სამინისტროში ნოტა გაიგზავნა.

გელა დუმბაძის თქმით, დაგეგმილია ასევე, უკრაინის საზღვრისა და საემიგრაციო სამსახურის უფროსებთან მისი შეხვედრა.

ამის შესახებ დუმბაძემ „კურიერთან“ საუბარში განაცხადა.

„მინდა საქართველოს ყველა მოქალაქემ იცოდეს, რომ კიევში საქართველოს ელჩი აკეთებს მომენტალურ რეაგირებას ყველა მსგავს შემთხვევაზე. ცალკეულ შემთხვევებზე დგება სპეციალური ნოტა და შედგა ყველა ადრე არსებულ შემთხვევასთან დაკავშირებითაც შეხვედრები უკრაინის საგარეო საქმეთა სამინისტროში. ბოლო შემთხვევას რაც შეეხება, უკრაინის მხარემ ოფიციალურად განაცხადა, ეს არის ქვეყნის უსაფრთხოების სამსახური, ეროვნული პოლიცია, საემიგრაციო სამსახური, რომ ამ მოქალაქეების ქმედება, საქმიანობა ეწინააღმდეგებოდა უკრაინის უსაფრთხოების, ეროვნული ინტერესებს და ამით აიხსნა ინფორმაციის ნაკლებობა ამ საკითხებთან დაკავშირებით.

ჩვენ ამ საკითხთან დაკავშირებით უწყვეტი კომუნიკაცია გვქონდა იმ მომენტიდან გამომდინარე, როცა საელჩომ ამის თაობაზე ინფორმაცია მივიღეთ არა მარტო საგარეო საქმეთა სამინისტროსთან, ყველა ზემოთ ხსენებულ უწყებასთან. ცალკე ამ საკითხთან დაკავშირებით უკრაინის საგარეო საქმეთა სამინისტროში ნოტა გაიგზავნა, ხვალ პრემიერ-მინისტრის დავალებით შედგება ჩემი შეხვედრა ქვეყნის საზღვრის უფროსსა და საემიგრაციო სამსახურის უფროსთან, სადაც ეს საქმეები დეტალურად იქნება განხილული.

ყველა ქვეყნას აქვს უფლება სხვადასხვა ფორმით გამოხატოს თავისი გადაწყვეტილება. ეს არის უკრაინის შიდა საქმიანობა. როდესაც საუბარია ფორმულირებაზე, აქ არის სხვადასხვა ფორმულირება, შეიძლება მეტ-ნაკლებად ასახავდეს ამ სიტუაციას. კონკრეტულად ხაზგასმას ამ პიროვნებებთან დაკავშირებით, რომ ისინი ამა თუ იმ კავშირში იყვნენ საქართველოს ექსპრეზიდენტთან და მის პოლიტიკურ საქმიანობასთან, ამას მოცემულ ეტაპზე ადგილი არ აქვს“,- განაცხადა გელა დუმბაძემ.

მონიკა დავლიანიძე