სამართალი

გიგი უგულავას და ინციდენტის ერთ-ერთ მონაწილეს ბრალი ძალადობის მუხლით წარედგინათ

თბილისის აეროპორტში ფიზიკურ დაპირისპირებასთან დაკავშირებით, გიგი უგულავას და ინციდენტის ერთ-ერთ მონაწილეს ბრალი ძალადობის მუხლით წარედგინათ, გოკა გაბაშვილი და ინციდეტის ასევე ერთ-ერთი მონაწილე დაზარალებულად სცნეს.

შინაგან საქმეთა სამინისტროს ინფორმაციით, გიგი უგულავასა და საპირისპირო მხრიდან ერთ-ერთ მონაწილეს ბრალი 126-ე მუხლით წარედგინათ, რაც ძალადობას გულისხმობს. შინაგან საქმეთა სამინისტროს თანამშრომლებმა მათ წარდგენილი ბრალდება უკვე გააცნეს.

შეგახსენებთ, რომ ინციდენტი დღეს დილას თბილისის აეროპორტში მოხდა. „ევროპული საქართველოს“ ინფორმაციით, ორი უცნობი მამაკაცი გიგი უგულავასა და გოკა გაბაშვილს თავს დაესხა და ფიზიკურად გაუსწორდა.

გიგი უგულავას ადვოკატის გიორგი გელხაურის განცხადებით, გიგი უგულავას ბრალი მხოლოდ იმიტომ წაუყენეს, რომ მან თავდამსხმელისგან თავი დაიცვა.

“წარმოიდგინეთ, რომ ადამიანი, ამ შემთხვევაში გიგი უგულავა და გოკა გაბაშვილი მიემგზავრებიან თბილისის საერთაშორისო აეროპორტიდან. მათთან მივიდა ორი პიროვნება. დაუწყეს სიტყვიერი შეურაცხყოფა, შემდეგ ფიზიკური შეურაცხყოფა, ამ დროს რომ თავი დაიცვა, რომელიმე თავდამსხმელს რომ ხელი დაუჭირო, რომ მეორედ არ დაგარტყას და მან ამ ხელის დაჭერით განიცადოს ტკივილი, აი ამიტომ მოხდა ბრალის შერაცხვა გიგი უგულავასთვის. საქმის მასალები ჯერ არ მოუციათ. როგორც გვითხრეს, ხვალ გადმოგვცემენ ყველა მტკიცებულებას. ძალადობას გიგი უგულავას მხრიდან ადგილი არ ჰქონია. ხვალინდელ პროცესზე ასევე გაგვაფრთხილეს, რომ შესაძლოა სასამართლომ აღმკვეთი ღონისძიების შესახებ იმსჯელოს. გამომდინარე გარემოებებიდან და უგულავას არაბრალეული ქმედებიდან, ჩვენ მოვითხოვთ, რომ არცერთი აღმკვეთი ღონისძიება არ შეეფარდოს მას”,- განაცხადა ადვოკატმა.