პოლიტიკა

გიორგი გახარია ნატო ჩხეიძეს: ვერ მივხვდი ეპისტოლარულ ჟანრს

პრემიერმინისტრმა, გიორგი გახარიამ დამოუკიდებელ დეპუტატ ნატო ჩხეიძის კითხვას არ უპასუხა, რადგან თქვა, რომ ვერ გაიგო, ვერ მიხვდა ეპისტოლარულ ჟანრს.

"ვერ მივხვდი თქვენს ეპისტოლარულ ჟანრს, ამიტომ ძალიან გთხოვთ ეს კითხვები წერილობით მომაწოდეთ და წერილობით გიპასუხებთ", - მიმართა გახარიამ ჩხეიძეს.

ნატო ჩხეიძემ კითხვის დასმისას პრემიერს უთხრა, რომ ბოლო თვეში პარლამენტში 2 ვიზიტისას გახარიამ მის კითხვებს კატეგორიულად არ უპასუხა.

დეპუტატმა პრემიერს გაახსენა წინა ვიზიტების დროს დასმული კითხვები - თუ რა ბედი ელოდათ სამშობლოში დაბრუნებულ ემიგრანტებს და რა გაკეთდა ექიმებისთვის "წამახალისებელი ელემენტების" ფარგლებში. დამატებით კი 2 ახალი კითხვა დასვა:

"თქვენ თქვით, რომ ივანიშვილის დონაციას გამოიყენებდით მეტი გაჭირვების პირობებში, რა არის ეს მეტი გაჭირვება და კონკრეტულად რა პროექტში აპირებთ ამ თანხის გამოყენებას. მეორე, მე არ ვიცი ბატონ სესიაშვილს რატომ დასჭირდა თქვენი წახმარება 20 ივნისთან დაკავშირებით, ალბათ იმიტომ, რომ თქვენ ლოკალური ამნეზია გაქვთ ამ საკითხთან. რა არგუმენტები გაგაჩნიათ [საპარლამენტო] შტურმის დასასაბუთებლად, გარდა ზეპირსიტყვიერი რიტორიკისა", - თქვა ნატო ჩხეიძემ.