კომენტარი
გიორგი კვირიკაშვილი მოვიდა არსაიდან და ის გაქრება არსად - ზაზა ბიბილაშვილი
„ნაციონალური მოძრაობის“ წევრის ზაზა ბიბილაშვილის შეფასებით, ქვეყნის პრემიერი გიორგი კვირიკაშვილი პოლიტიკაში არსაიდან მოვიდა და ის ასევე გაქრება არსად.
ამის შესახებ ბიბილაშვილმა ჟურნალისტებს განუცხადა.
„სიტყვა „სინდისის“ გამოყენება კვირიკაშვილისგან ცოტა უხერხულია. წარსულის პოლიტიკოსებზე, საერთოდ პოლიტიკოსებზე საუბარი ასევე უხერხულია. კვირიკაშვილი მოვიდა არსაიდან და ის გაქრება არსად, ისევე როგორც გაქრა ღარიბაშვილი, ისევე როგორც გაქრება ნარმანია. მაშინვე გაქრება, როგორც კი ეს ბიძინა ივანიშვილს მოუნდება. დღეს საქართველოს მართავს ერთი ოჯახი და ჩვენი ხელისუფლება, ჩვენი მთავრობა არის ამ ერთი ოჯახის მოსამსახურეებისა და მოჯამაგირეების კრებული. ჩვენ - ქართველი ხალხი, არ დავუშვებთ იმას, რომ თბილისის ისტორიული ცენტრი ამ ოჯახს სათამაშოდ გადაეცეს საკუთარი ეზოს კეთილმოსაწყობად“,-აღნიშნა ბიბილაშვილმა.
„ნაციონალური მოძრაობის“ მიერ, გუშინ თბილისის მერიასთან გამართული აქციის შეფასებისას, გიორგი კვირიკაშვილმა დღეს განაცხადა, რომ ენმ-ის წევრები არიან წარსულის პოლიტიკოსები, „გაკოტრებული პარტიისა და გაკოტრებული ლიდერის მიმდევრები“.
მონიკა დავლიანიძე