კომენტარი
გიორგი კვირიკაშვილი პარლამენტში მივა
საქართველოს პრემიერ-მინისტრი მომდევნო საპარლამენტო სესიაში, თავის გუნდთან ერთად, მიიღებს მონაწილოებას.
ამის შესახებ პარლამენტში უმრავლესობის ლიდერმა არჩილ თალაკვაძემ განაცხადა.
პარლამენტში დღეს, მთავრობის სტრუქტურული ცვლილებების შესახებ საკანონმდებლო პაკეტს განიხილავენ.
თალაკვაძემ ოპოზიციის კითხვას უპასუხა იმის შესახებ, თუ რატომ არ ცხადდება პრემიერი პარლამენტში?!
„უნდა ვილაპაკოთ რეალობა, სიმართლე, წინააღმდეგ შემთხვევაში მერე არ უნდა გეწყინოთ, როდესაც არჩევნებზე ხალხს თქვენი არ სჯერა ხოლმე.
ბატონო გიგა, მინდა გაგახაროთ და გითხრათ, რომ ბატონი პრემიერ-მინისტრი შემდეგ საპარლამენტო სესიას პირადად, თავის გუნდთან ერთად დაესწრება, მიიღებს მონაწილეობას. შეკითხვები, პასუხები, დებატი - ეს ყველაფერი იქნება და აგერ ვნახოთ რა შეკითხვები გექნებათ და რა პასუხსაც მიიღებთ, მაგას შემდეგ სესიაზე დაინახავთ.
რაც შეეხება თქვსნ შეკითხვას: სად არის პრემიერ-მინისტრიო?! პრემიერ მინისტრი არის იქ, სადაც მას აქვს კონკრეტული ამოცანები და საქმე. თქვენც კარგად იცით პრემიერ-მინისტრის საქმე რა არის.
პრემიერ-მინისტრი არის იქ სადაც საქართველოს აქვს 5%-ანი ეკონომიკური განვითარება, საგარეო პოლიტიკის თვალსაზრისით წარმატებები, ბიუჯეტის თანმიმდევრული ხარჯვა; არის იქ სადაც საქართველოს აქვს მდგრადი ეკონომიკური განვითარება, ინვესტიციები, სადაც საქართველოს აქვს, რაოდენ საწყენი არ უნდა იყოს ზოგ-ზოგიერთებისთვის, სტაბილურობა და მშვიდობა“,-აღნიშნა თალაკვაძემ.
მონიკა დავლიანიძე