სამართალი
გიორგი მამალაძე ცდილობს სხვას გადააბრალოს მისთვის ბრალად შერაცხული - პროკურორი
პროკურორების შეკითხვებს ე.წ. მატროსოვის ციხეში ,,ციანიდის საქმეში’’ ბრალდებული გიორგი მამალაძე, დაახლოებით, 10 საათის განმავლობაში პასუხობდა. ამით მისი დაკითხვა სასამართლო პროცესამდე დასრულებულია.
როგორც დაკითხვის შემდეგ ადვოკატებმა განაცხადეს, მამა გიორგიმ ყველა კითხვას ამომწურავად გასცა პასუხი. დაკავებულის ინტერესების დამცველების ინფორმაციით, დეკანოზის დაკითხვა დასრულებულია. მათივე თქმით, ისინი დეკანოზის უდანაშაულობას დაამტკიცებენ.
საქმის პროკურორ, ჯარჯი წიკლაურის განმარტებით, ბრალდებულის პასუხები მათ მიერ დასმულ შეკითხვებზე არასერიოზულია და ვერც ერთ კითხვაზე პასუხები ვერ მიიღეს. პროკურორის განმარტებით ბრალდებული ცდილობს რაღაც სურათი დახატოს და დანაშაული სხვებს გადააბრალოს.
,,ჩვენს მიერ დასმულ ვერც ერთ მნიშვნელოვან შეკითხვას გიორგი მამალაძემ დამაჯერებელი პასუხი ვერ გასცა. მისი ნაამბობი მთლიანად წინააღმდეგობაში მოდის საქმეში არსებულ მტკიცებულებებთან და იმ ჩანაწერებთან, რომელიც ჩვენ გავასაჯაროეთ. მთელი ის ინფორმაცია, რასაც გიორგი მამალაძე გვაწვდის, არის მისი უსუსური მცდელობა, სხვას გადააბრალოს მისთვის ბრალად შერაცხული და თავი დააღწიოს მოსალოდნელ პასუხისმგებლობას. ბრალდებულის ჩვენება მთლიანად აბსურდულია. იგი თავიდან ამბობდა, რომ შორენა თეთრუაშვილი ციანიდის შეძენას მისი ახლობელი ოქრომჭედლისთვის ცდილობდა, შემდეგ განაცხადა, რომ ციანიდით შორენა თეთრუაშვილი აპირებდა თვითმკვლელობას. მან კიდევ ერთი ვერსია მოიფიქრა, ვითომდა გავრცელებულ ჩანაწერებში ის ხუმრობდა,’’ - განუცხადა ჟურნალისტებს ჯარჯი წიკლაურმა.
კითხვაზე, რა ფორმით ფიგურირებს საქმეში პატრიარქის დაცვის ყოფილი უფროსი სოსო ოხანაშვილი, საქმის პროკურორი აცხადებს, რომ ოხანაშვილს ამ დროისთვის მოწმის სტატუსი აქვს და ის ერთხელ დაიკითხა.
ნინო ექვთიმიშვილი