პოლიტიკა

გიორგი მარგველაშვილი და მაიკ პენსი ვაზიანში სამხედროებს ხვდებიან

ამ წუთისთვის აშშ-ის ვიცე-პრეზიდენტი მაიკ პენსი და საქართველოს პრეზიდენტი გიორგი მარგველაშვილი ვაზიანის სამხედრო ბაზაზე იქ შეკრებილ ქართველ და უცხოელ სამხედროებს მიმართავენ.

გიორგი მარგველაშვილმა პენსის ვიზიტის მნიშვნელობაზე გაამახვილა ყურადრება და საქართველოს მხარდაჭერისთვის მადლობა გადაუხადა.

„თქვენი ვიზიტი ჩვენი პარტნიორობის გაღრმავებისთვის ძლიერი სიგნალი გახლავთ. მადლობა ჩვენი ტერიტორიული მთლიანობის მხარდაჭერისთვის. დარწმუნებული ვარ, რომ თქვენი ვიზიტი შემდგომში კიდევ უფრო გააძლიერებს ჩვენს ქვეყნებს შორის ურთიერთობას. ძალა ერთობაში. ეს საქართველოს დევიზია. ღმერთმა დალოცოს ჩვენი მამაცი ჯარისკაცები. ღმერთმა დალოცოს ჩვენი ერები", - განაცხადა საქართველოს პრეზიდენტმა.

ტერიტორიაზე, სადაც პენსი და მარგველაშვილი სამხედროებს მიმართავენ, მობილიზებულია ტექნიკა, რომელიც სპეციალურად ქართულ-ამერიკული სამხედრო წვრთნებისთვის „ღირსეული პარტნიორი-2017“-სთვისაა ჩამოყვანილი.

გარდა ამისა, ღონისძიებაზე იმყოფებიან საქართველოს პრემიერ-მინსიტრი გიორგი კვირიკაშვილი, საქართველოს საგარეო საქმეტა მინისტრი გიორგი ჯანელიძე, საქართველოს ელჩი აშშ-ში დავით ბაქრაძე და საქართველოს თავდაცვის მინისტრი ლევან იზორია. ისინი ასევე მიმართავენ ბაზაზე შეკრებილ სამხედროებს.

მრავალეროვნული სწავლება "ღირსეული პარტნიორი 2017" ვაზიანის სამხედრო აეროდრომზე 30 ივლისს დაიწყო და 12 აგვისტომდე დასრულდება.

ანა მებურიშვილი