პოლიტიკა
გიორგი მარგველაშვილი ქართველ ხალხს გაემიჯნა და ოპოზიციის პრეზიდენტად დარჩა - ირაკლი კობახიძე
საქართველოს პარლამენტის თავმჯდომარის, ირაკლი კობახიძის განცხადებით, ქვეყნის პრეზიდენტი ცდილობდა, არ ჩართულიყო საკონსტიტუციო პროექტის შემუშავებაში და ხელი შეეშალა მმართველ გუნდსა და ოპოზიციას შორის შეთანხმების მიღწევაში. ამის შესახებ კობახიძემ პირველ არხთან ინტერვიუში თქვა.
„პრეზიდენტი საბაბს ეძებდა იმისთვის, რომ პროცესში არ ჩართულიყო და ხელი შეეშალა როგორც კომისიისთვის და პარლამენტისთვის, ასევე კონსენსუსის ჩამოყალიბებისთვის. მან ამ მიზანს გარკვეულწილად მიაღწია, თუმცა მთავარ მიზანს ვერ მიაღწია და ძალიან დახვეწილი კონსტიტუციის მიღება შევძელით, რითაც გამარჯვებული ქართველი ხალხი დარჩა“, - თქვა კობახიძემ.
პარლამენტის თავმჯდომარემ აღნიშნა, რომ კონსტიტუციაზე მუშაობისას მან მიმართა პრეზიდენტს, ჩართულიყო პროცესში, რაზეც დაუსაბუთებული უარი მიიღო.
კობახიძის მტკიცებით, გიორგი მარგველაშვილს კომისიის ფორმატზე ალოგიკური კითხვები მაშინ გაუჩნდა, რაც ის „ოპოზიციონერი პრეზიდენტი“ გახდა.
პარლამენტის თავმდჯომარის განმარტებით, პრეზიდენტი ოპოზიციის მხარდაჭერით ხალხს გაემიჯნა.
„პრეზიდენტმა საკუთარი თავის სრული ილუსტრაცია მაშინ მოახდინა, როცა ოპოზიციის მიერ შექმნილ დოკუმენტს თანხმობის დოკუმენტი უწოდა. მან პირდაპირ აჩვენა, რომ ოპოზიციის პრეზიდენტია და არა - ქართველი ხალხის. ის ქართველ ხალხს გაემიჯნა და ოპოზიციის პრეზიდენტად დარჩა. პრეზიდენტი თავის თავს ყოველდღიურ რეჟიმში ასე წარმოაჩენს და ეს დღესავით ნათელია“, -განაცხადა კობახიძემ.