პოლიტიკა

გიორგი ვაშაძის ,,ახალი საქართველო” პაატა ბურჭულაძის საარჩევნო ბლოკში რჩება

გიორგი ვაშაძის მოძრაობა ,,ახალი საქართველო” პაატა ბურჭულაძის საარჩევნო ბლოკში რჩება. ამის შესახებ გიორგი ვაშაძემ და პაატა ბურჭულაძემ ერთობლივ ბრიფინგზე განაცხადეს. ბლოკში ასევე რჩება ,,ახალი მემარჯვენეები“.

,,ჩემთვის ბევრი საკითხი მოულოდნელი იყო. მჭირდებოდა გავლა სხვადასხვა თემის, საუბარი სხვადასხვა საკითხთან დაკავშირებით ბლოკში. ჩემთვის ერთი რამ არის მთავარი - დღეს ვარ აქ, რადგან დარწმუნებული ვარ, რომ ეს არის აბსოლუტურად დამოუკიდებელი ძალა, რომელიც იბრძვის გამარჯვებისთვის. ვფიქრობ, რომ გუნდს, რომელიც შეკრულია ჩვენს გაერთიანებაში, კონკრეტული გეგმა, ხედვა და სტრატეგია აქვს, თუ როგორ განვითარდეს ქვეყანა.

დღის მანძილზე გვქონდა საუბარი ამ თემებზე და მივიღე გადაწყვეტილება ჩემს თანაგუნდელებთან ერთად, რომ ვაგრძელებთ ბრძოლას საარჩევნო ბლოკის სახით ამ არჩევნებში და ვაპირებთ, რომ ძალიან მაგარი შედეგი დავდოთ”, - განაცხადა გიორგი ვაშაძემ.

ერთობლივ განცხადებას წინ უძღოდა პაატა ბურჭულაძისა და გიორგი ვაშაძის შეხვედრა.

შეგახსენებთ, გუშინ ბლოკის შემადგენლობას ახალი პოლიტიკური ცენტრი ,,გირჩი“ გამოეთიშა.

მარი ნამგალაძე